Footer

Nasayaat ti panagserbida a tanod, maikkan iti binulan nga insentibo

VIGAN CITY – Kalpasan dagiti barangay officials, sumublat dagiti barangay tanod a maikkan iti insentibo tapno nasaysayaat pay ti ipaayda a serbisio iti lugarda.

Inaprobaran ti Sangguniang Panlungsod ditoy iti sessionda itay Setiembre 25 iti third and final reading ti Ordinance No. 06-25 a mangipaay iti monthly performing benefits kadagiti deserving a barangay tanod kas insentibo iti nasayaat a serbisioda.

Manamnama nga umawat iti P300 incentive allowance wenno performance allowance iti binulan dagiti deserving a barangay tanod. Adda 530 a bilang dagiti tanod iti siudad.

Sagudayen ti ordinansa a mailatangan iti P1,908,000 iti tinawen nga aggapu iti Annual Development Fund ti city government para kadagiti nasayaat ti panagserbida a barangay tanod.

Segun kadagiti proponents ti nasao nga ordinansa, dagiti sumaganad ti kasapulan tapno maikkan ti barangay tanod iti performance allowance: awanan iti nakasaklang a kaso maikontra kenkuana; nagserbi iti saan a nababbaba ngem tallo a bulan, ken awan ti tallo nga aldaw a langanna iti makabulan a panagserbina.

Sakbayna, nangipasa ti konseho ditoy iti ordinansa a mangted iti binulan a monthly allowance kadagiti deserving a barangay officials ditoy siudad.

Kas intuding ti nasao nga ordinansa, maikkan dagiti barangay iti P5,500 a P1,500 ti maited iti kapitan ti barangay idinto a pagbibingayan dagiti barangay kagawad a pakairamanan ti tesorero ken sekretario, ken ti barangay SK president ti P4,000.

Saan a karaman a maikkan iti binulan a performance allowance dagiti opisial ti barangay nga addaan iti kaso administratibo; dagiti di pay nakapagserbi iti puestoda iti barangay iti nakurkurang ngem innem a bulan; dagiti di nakaipaay iti makapnek a serbisio kas intuding ti R.A. 7160; dagiti addaan langan wenno leave of absence iti nasursurok ngem dua nga apagkatlo tunggal bulan; ken dagiti saan a nakaidatag iti binulan a makapnek a report iti nagapuananda iti barangay.

Kas kadagiti barangay officials, adda met mabuangay a monitoring board a mangkita iti performance dagiti deserving a tanod a maidatag iti mayor para iti implementasionna.

Manamnama met ti pannakaidatag ti sabali nga ordinansa a mangted iti umasping nga insentibo kadagiti barangay health workers babaen ti singasing ni Konsehal Felix Aninag.

Comments are closed.