Footer

Panaghold-ap, tinungday ti Candon-PNP

CANDON CITY – Saan a nagballigi ti maysa a robbery gang a mangkurimes iti maysa a paggasolinaan gapu ta nasaepan ida dagiti pannakabagi ti linteg ditoy.

Tiniliw dagiti polis dagiti masuspetsa a pakairamanan da Filomeno Abarquez, 35, tricycle driver ken residente ti barangay San Pedro iti daytoy a siudad; ni Henry Sumaquiab, 24, residente ti Calaoan, Candon; ken ni Rolly del Rosario, 29, a residente ti San Pedro.

Mapapati a ni del Rosario ti look-out ti grupo iti nasao a panggep a panaghold-ap.

Nakumpiska dagiti polis ti maysa a homemade backshot ken ni Abarquez ken maysa a kutsilio ken ni Sumaquiab.

Segun iti polis, nakaawatda iti tip manipud iti  di nagpabigbig mainaig iti plano ti grupo a manghold-ap iti gasolinaan ket sinipsiputanda ti garaw dagitoy iti unos iti makalawas.

Mapapati nga umuna a puntiria ti grupo a takawan ti maysa a bumbay ngem nagbaliw ti planoda ket ti Shell Gasoline Station ti pinanggepda a takawan.

Maisagsagana ti kaso maikontra kadagiti suspetsa.

Comments are closed.