Footer

2 lalaki a nanglibas iti kinnanda, natiliw

CANDON CITY – Dua nga agtutubo a nagpanggep a nanglibas ti inorderda a mami ken aroskaldo ken naalaan iti paltog ti kinemmeg dagiti security guard itay lawasna ditoy.

Nainaganan dagiti natiliw a da Rustan Galot, 21, residente iti Calaoaan, ken ni Francis, 16, residente iti San Antonio iti daytoy a siudad. Naala iti maysa kadakuada ti maysa a homemade ‘one pung’ nga addaan iti bala ti kalibre .38.

Naammuan iti  report ti pulisia a pinanggep dagiti dua a suspetsa a tarayan ti kinnanda a  mami ken aroskaldo iti maysa a panganan iti abay ti Jollibee.

Kinamakam ti managan Molie-Ann dagiti suspetsa tapno singirenna ti bayadda, ngem mapapati nga inasut ni Galot ti paltogna sana impaturong ken ni Molie-Ann.

Nagpulong ni Molie-Ann kada Rodelino Pascua, 42, ken Elpidio Batin, 36, agpada a guardia, ket dita a kinemmegda dagiti dua a lalaki sada impan iti kuerpo ti pulisia para iti interogasion.

Comments are closed.