Footer

3,314 umili ti natulongan ti Ilocos Sur Hotline

VIGAN CITY – Manipud Agosto 2005 agingga iti Agosto 2006, nasurok a 3,300 dagiti tattao a pakairamanan dagiti residente iti sabsabali a probinsia ti natulongan ti Ilocos Sur Hotline.

Daytoy ti naammuan manipud ken ni Provincial Social Welfare and Development Administration  head Ferdinand Concepcion bayat ti pannakipatpatangna kada station manager Chato Alda ken Eugene Paet, anchor ti Ilocos Sur Hotline itay nabiit.

Kinuna ni Concepcion nga iti kadagupan a 3,314 a natulongan ti Hotline, agdagup iti 1,486 dagiti umili ti naikkan iti food assistance. Tunggal supot, adda linaonna a bagas, kape, noodles, sardinas, corned beef ken dadduma pay a taraon, segun iti dadaulo ti DSWD ditoy probinsia.

Kinuna ni Concepcion a naserbian uray dagiti residente iti sabsabali a probinsia a nagpatulong iti Hotline ket agdagup iti 144 ti naikkan iti libre a pleteda nga agawid manipud iti Partas babaen ti tulong ni Randy Singson.

Kinuna ni Concepcion nga agdagup met iti 150 dagiti umili nga inyasidegda a matulongan kadagiti nadumaduma nga institusion kas iti Philippine Charity Sweepstakes Office ken dadduma pay a health institutions.

Iti met Sagutanka, Lolo ken Lola, 85 ti naikkan iti food assistance, 78 ti naikkan iti libre nga agas, ken 60 iti pinansial a tulong.

Dagiti sumaganad ti naited a serbisio kadagiti ubbing iti Wish Ko Sa Hotline: school supplies – 203; bisikleta – 5; nebulizer – 1; food assistance – 1; ken para kadagiti disabled, 5 a wheelchair; 4 a crutches ken maysa nga stroller.

Tunggal Sabado a maang-angay ti Ilocos Sur Hotline ket hosts ditoy da Gov. Luis “Chavit” Singson ken ni Vice Gov. Deogracias Victor “DV” Savellano.

Itay Agosto 26, rinambakan ti Hotline ti maika-7 nga anibersariona. Nadumaduma a premio a pakairamanan dagiti 20 a kalding ken 2 a baka, malaksid laeng kadagiti radio, telebision, bentilador, ken kuarta ti rinipa ti gobernador, ni Vice Gov. Savellano, Bokal Ronald Singson, Mayor ti Tagudin Roque “Jun” Verzosa, ken dadduma pay nga opisial ti probinsia. 

Naiyawat met ti P10,000 a tulong pinansial kadagiti taga-Ilocos Sur nga OFWs a nagawid iti probinsia gapu iti pannakaipitda iti gubat iti Lebanon.

Comments are closed.