Footer

Dagup a kataltalonan iti pagilian, 45% laeng addaan padanum – NIA

VIGAN CITY – Manipud iti tallo milion nga irrigable lands iti pagilian, 1.4 milion laeng wenno 45 porsiento ti addaan padanum.

Daytoy ti impalgak ni National Irrigation Administration head Gen. Arturo Lumibao bayat ti interbio kenkuana ti media ditoy itay nabiit.

“We will endeavor to bridge the gap tapno dagiti dadduma pay a farmers a di naserbian ti NIA, maikkan met iti gundaway nga agapit kadagiti benepisio nga ipaay ti NIA,” kinuna ni Lumibao.

Innayon pay ni Lumibao nga iti 1.4 milion nga irrigated lands, 30 porsiento ti dimmakes, 30 porsiento ti masapul a marehabilitar ket daytoy pay ti maysa a prioridad a proyekto ti NIA malaksid iti konstruksion dagiti communal irrigation systems ken national irrigation systems.

Nupay kasta, kinuna ti nagretiro a hepe ti Philippine National Police a masapul ti kuarta, ti budget kadagitoy a proyekto  isu a kumkumbinsirenna dagiti legislators a mangted iti kanayon a budget ken pundo ti NIA.

Kinuna ni Lumibao a ti agrikultura ti sekreto ti panagdur-as ti China, Thailand ken Indonesia “isu a dagitoy modelo a nasion koma ti surotentayo tapno dumur-astayo, nangruna dagiti mannalon.”

Immay ditoy probinsia ni Lumibao itay nabiit a kaduana ni Dip. Salacnib Baterina ket binisitada ti Banaoang Irrigation Pump Project, proyekto ti padanum a manamnama a mangpadanum kadagiti sumag-mamano nga ili iti umuna a distrito a pakairamanan ti Bantay, San Ildefonso, Sto. Domingo ken Magsingal.

Binisita pay da Lumibao ti Agno River Irrigation Project, ti dati a San Roque Multi-purpose Project, a manamnama a mangpadanum kadagiti kataltalonan iti Pangasinan, Tarlac ken paset ti Nueva Ecija.

Kinuna ni Lumibao a no malpas ti Banaoang Irrigation Pump Project, Agno River Irrigation Integrated Project ken Casecnan Irrigation Project, ngumato ti produksion ti bagas ken mapastrek dagiti mannalon idinto a dagiti maaramid a farm to market roads, agsublinto a pagsayaatanda.

Kinuna ni Lomibao a ti Banaoang Irrigation Pump Project ti maysa a proyekto a “pudno a mangtulong kadagiti mannalontayo nangruna ditoy Ilocos Sur ket no adda pay dadduma a posible a pagtaudan iti danum tapno dumakkel ti produksion dagiti mannalon, daytoy ti ipasdek ti NIA.”

Idi ni Lomibao pay ti hepe ti PNP, naipatakder ti P10-milion ti pategna ken naidumduma ti diseniona a police station ditoy siudad.

Comments are closed.