Footer

Naglibas ni Boy Kimat! (Maikanem a paset)

MANIPUD iti bulsa ti badona, inruar ni Jessie ti retrato ni Lily a naalada iti apartment iti rabii a panangsurotda kenkuana manipud iti klub.

“Daytoy kadi?” inamad ni Jessie nupay ammonan ti sungbat ni Dionnie.

“Wen, bossing. Kasano nga adda retratona kenka?” pilio ti timmandag nga isem ni Dionnie.

“Business, not pleasure, my friend,” kinuna ni Melvin a puon ti nagkatawaan ni Jessie.

Saanen a nagbayag ni Jessie. Adda iti elebeytor idi timmawag ni Melvin.

“Bossing, adda bulletin manipud iti estasion! Adda  nga aglemlemmeng ni Boy Kimat iti maysa a balay iti asideg ti Mindoro airport. Maysa a lalaki ti timmawag babaen ti selpon.”

Arig namitlo la nga inaskaw ni Jessie ti pasilio. Agan-andaren ti patrol car.

Nagwengweng manen ti transmitter.

“Naipiskoten ni Kirat iti maysa a balay iti amianan ti Mindoro airport! Proceed to that place for reinforcement!”

Pinaaweng ni Melvin ti sirena ket bimmanesbes ti lugan a nangpanurnor iti Mabini Street. Nagsikkoda iti Titong Singson Commercial Complex. Nagpalaudda iti  Bonifacio sa iti kalsada nasional a kumamang iti airport. Uray la naganit-it dagiti pilid idi isardeng ni Melvin ti lugan iti likudan dagiti police car. Immulog ni Jessie ket immabay iti hepeda.

“Ultimatum daytoyen, Boy Kimat!” imballaag ni Supt. dela Cruz. “Ikkandaka iti lima a minutos a sumuko!”
“Saannak a sumuko!” impukkaw ni Boy Kimat ket pimmaltog iti namitlo.

Imbilin ni Supt. dela Cruz ti panagputok dagiti polisna.

Rinapido dagiti  polis ti balay. Gimluong ti ikkis manipud iti balay.

Insenias ni Supt. dela Cruz ti panagwaras dagiti polis iti iseserrekda iti balay.

Sinaruno ni Jessie ti maysa a polis a nagarudok a simrek iti inaladan. Simmapidengda iti ridaw sada nagpaliiw.

Kinugtaran ni Jessie ti ridaw. Apaman a naibuang, insuyona ti bagina iti suelo idinto a nagsagana a mangkalbit iti gatilio.

Naidasay ni Boy Kimat iti abay ti tawa! Ap-apputenna ti barukongna. Natinep ti badona iti dara.

Kinugtaran ni Jessie ti paltog iti sakaanan ni Boy Kimat.

 Nagling-i ti ulo ni Boy Kimat. Madamdama, nagsalungayngayen.

Impalawlaw ni Jessie ti panagkitana iti uneg ti salas. Agkaiwara dagiti naiburandis nga alikamen.

“Good work, men,” kinuna ti hepeda. “Nagpatingga met laengen ni Boy Kimat!”

“Ni Lily?” dinamag ni Jessie.

“Adda iti police station. Nakalibas ni Lily ket impatuldona ti nangipaingan kenkuana ni Boy Kimat.”

“Kunak man no lalaki ti nangitimbre ken ni Boy Kimat?”

“Sabali laeng ti tawag iti selpon,” kinuna ti hepe.

“Di la mabalin a diyo pay palusposan ni Lily? Adda sumagmamano laeng a saludsodek kenkuana, tsip,” kinuna ni Jessie.

“Okey. Dimo parigaten. No awan, saantayo a naipiskot ni Boy Kimat.”

“Don’t worry, chief. Adda laeng sumagmamano a loose ends a patalgedak,” kinuna ni Jessie.

Sineniasan ni Jessie ni Melvin tapno agsublida iti police station. Bayat ti panagdaliasat ti lugan, tinawagan ni Jessie ni Andy babaen ti selpon.

“Padasem man a pagdiligen ti lemma ti bala a naala iti bagi ti asawa ni Mark Corpuz ken iti lemma ti bala a nanggudas kada Alias Diango ken ni Ditas?” kinunana. “Maammuak koma  within five minutes. Daw-asenmi dita, wen?”

“No big deal, bossing.”

Nakasaganan nga agpayso ti resulta ti panangamiris ni Andy iti dua a paltog.

“Maymaysa a paltog ti naggapuanda,  bossing,” kinuna ni Andy.

Nagturong da Jessie iti Paratong. Impakitana ti retrato ni Boy Kimat iti baket.

“Daytoy kadi ti nakitam iti apartment ni Lily idi kanikadua a rabii?” inamadna.

“Sabali,” ingngilangil ti babai.

“Nakitkitam toy akinretrato a pimmasiar ken ni Lily?”

“Saan pay. Dayta laeng no iranana ti agpasiar iti naladaw a rabii ket nakaturogakon.”

Nagyaman ni Jessie iti baket.

Imbilin ni Jessie ti  idadaw-asda iti police station. Nagtarusda iti interrogation room. Madama a maal-ala ti statement ni Lily.

“Nangikabilam iti paltog nga impaidulin kenka ni Boy Kimat idi mabalud?” sinaludsod ni Jessie.

“Iti drawer ti tokador.”

“Nakatulbek ti tokador?”

“Wen.”

“Malaksid kenka, sino pay ti addaan tulbek iti tokador?”

“Siak laeng.”

“Agul-ulbodka! Adda met tulbek ni Mario Corpuz, saan kadi?” pinerreng ni Jessie ni Lily.

Bimsag ni Lily.

Saanen a nagsaludsod pay ni Jessie. Timmawag iti M & M Enterprises. Saan a simrek ni Mario Corpuz.

“Saannakon nga agpalpalikawkaw, Mr. Vergara,” kinuna ni Jessie. “Kaano ti panagukagyo iti libro ti kompania?” sinaludsod ni Jessie. “Kayatko a maammuan no nadalus met la ti kuenta ni Mario Corpuz.”

“Is it necessary?”

“This is a murder case, Mr. Vergara,” nababa ngem natbag ti timek ni Jessie.

“You’re right,” kinuna ti manager. “Adda agpayso mapagduaduaan a disbursement ni Mario iti librona. Naduktalanmi idi laeng naminsan. Ngem di koma rummuar daytoy ta alaenmi pay ti palawag ni Mario. Dimi kayat ti eskandalo.”

“Saanmi a maikari dayta, Mr. Vergara. Patulodannakami iti resulta ti panagaudityo.”

Imbaba ni Jessie ti auditibo sa nagsagawisiw. “Now, we are really going places, Andy!” nakunana.

Tinaliawna ni Lily. “Sumurotka, adda papanantayo.”

“P-papanantayo?” sinaludsod ni Lily idi madlawna nga agpadaya ti patrol car.

“Ammom la ketdi ti turongentayo,” kinuna ni Jessie.”

“N-Nasken kadi nga ikuyogdak?”

“Sika ti tulbek iti pannakarisut ti pammapatay.”

Pinalpaliiw ni Jessie ti rupa ni Lily idi agsardengda  iti sanguanan ti balay ni Mario Corpuz. Saan a nagbaliw ti ekspresion ti rupa ni Lily.

Imbilin ni Jessie ti panagbati da Melvin ken ni Lily. Dimsaag iti lugan.

“Paayabankayonto a dua kalpasan ti kinse minutos wenno nasapsapa,” kinunana.

Simrek ni Jessie iti inaladan. Nagtugtog iti ridaw.

“N-naidaw-askayo man, sir…” kinuna ni Mario Corpuz.

“Natayen ni Boy Kimat,” nakuna ni Jessie idinto nga impalawlawna ti panagkitana iti uneg ti salas.

“At last, nagpullon ti kriminal!” kinuna ni Corpuz.

“Agpayso, nagpullon ni Boy Kimat. Agpullo metten ti kriminal a nangpatay ken ni misismo, Mr. Corpuz. Sika!”

[ Maigibusto ]

Comments are closed.