Footer

Panagtakaw iti Vigan City, agraira?

VIGAN CITY – Aggiddiat ti panangiladawan dagiti opisial ti konseho ditoy siudad iti situasion ti panagtakawan a maisaysayangkat iti siudad.

Naipuon daytoy iti imbaskag ni Konsehal Alfredo “Jun” Figuerres nga agraira ti panagtakaw iti siudad iti naudi a sessionda iti konseho.

Ngem sabali ti panagkita ni Vice Mayor Franz Ranches.

“No agraira, kunatayo, kasla general rule a kasta ti mapaspasamaken…. iti panagkitatayo, isolated cases a nairana laeng a nagsasaruno,” kinuna ni Ranches iti pannakipatpatang ti Tawid News Magasin kenkuana iti opisinana.

Iti met biang ni Konsehal Germie Goulart, no agraira a kuna, kayariganna iti situasion idi tiempo dagiti sakasaka.

Ngem impetteng ni Figuerres nga agraira ti panagtakawan iti siudad kas patalgedan dagiti kaso ti panagtakaw ditoy a naukkonna iti rekord ti polis.

Kaudian kadagitoy ti pannakatakaw ti barut ti koriente iti nagtengnga a dike ken pannakatakaw ti barut met laeng iti Plaza Burgos a mapapati a naisayangkat iti maymaysa a rabii.

Daytoy ti maikadua a pannakatakaw ti barut iti Govantes dike. Sakbayna, natakaw dagiti mula a rose iti dayta a lugar.

Awan pay ti maitudo a nangiwayat kadagiti nasao a panagtakaw.

Sabali laeng dagiti naireport a panagagaw kadagiti selpon ken panagtakaw kadagiti pagtagilakuan ken iti tiendaan publiko ken pannakatakaw dagiti motorsiklo uray naiparkingda iti matatao a lugar.

Indagadag ni Figuerres ti pannakapaayab ni COP Maximo Torricer tapno agreport iti konseho mainaig kadagiti panagtakaw iti siudad.

Ngem kinuna ni Ranches a “generally, ammotayo a very peaceful ti siudad ti Vigan, ket kas panangtedna iti benefit of the doubt iti imbaskag ni Figuerres, paayabanda ni Torricer tapno “umay mangilawlawag wenno mangted iti report iti peace and order situation iti siudad.”

Kinuna pay ni Ranches nga idi dinamagna iti city prosecutor’s office no agraira wenno ngimmato ti insidente ti panagtakaw iti siudad, insungbatda a “saan met a kasdiay a makaalarma ket no adda man, saan a daydiay kunatayo a panagraira.”

“Adda dagiti mabilbilang a kaso ngem saan met a makaalarma ta isolated cases pay laeng,” kinuna ti bise mayor.