Footer

Pannakakongkreto ti Quezon Avenue, perhuisio kadagiti tattao – Kon. Agdamag

VIGAN CITY – Nabuntog ti pannakakalsada ti Quezon Avenue ditoy ket pagduaduaan a malpas iti naituding a petsa.

Daytoy ti kapaliiwan ni Konsehal Audie Agdamag idinto nga indagadagna ti nadardaras a pannakaitrabaho ti nasao a kalsada ta maperhuisio unayen ti publiko.

Narugian idi Mayo daytoy a proyekto nga agpateg iti P10 milion a nagtaud iti pundo ti Department of Public Works and Highways ket nakaiskediul a malpas iti Oktubre 17 daytoy a tawen.

Ngem sumaning-in dagiti akinkukua kadagiti pagtagilakuan gapu iti bimmassit a mapastrekda ken dagiti commuters gapu iti nakaro a trapiko a pakataktakanda.

Impaulog ni Mayor Ferdinand C. Medina ti Executive Order No. 13 a panagbalin ti Quezon Avenue a one-way street bayat ti pannakakongkreto ti nasao a kalsada ngem kaskasdi a naginad ti trapiko iti daytoy a paset ti kalsada a maibilang a sentro ti negosio ditoy.

Kinuna ni Agdamag nga Oktubre 17 ti naikabil a completion date ti nasao a proyekto ngem pagduaduaan a malpas daytoy agsipud iti mapaliiw a nabuntog a pannakatrabahona.

“Supposed to be a malpas iti Oktubre 17 ngem Oktubre 2 itan, ket diak ammo no kasano a malpasda ti kalsada,” kinuna ni Agdamag idinto nga indagadagna a mapaayaban ti DPWH ken ti City Engineering Office tapno ipalawagda ti estado ti nasao a proyekto agsipud ta dakkelen ti perhuisiona iti publiko.

Ngem iti immun-una a palawag ti DPWH, nupay ikagkagumaanda ti naannayas a pannakatrabaho ti proyekto, adda dagiti lapped, kas kadagiti poste ti elektrisidad a masapul a maiyalis ken masalapon a tubo ti danum ti Metro Vigan Water District ken dagiti pribado a concessionaires.

Kanaig daytoy, kinuna ni Vice Mayor Franz Ranches a tapno ma-maximize ti orasda, ipaimana ti kiddaw ni Agdamag iti komite ti inprastruktura tapno awisenna ti pannakabagi ti DPWH wenno ni Prov. Engineer ti First District Andrelito Tagorda, ken ti city engineer tapno mapagsaludsodanda iti konseho mainaig iti konstruksion ti kalsada iti Quezon Avenue, ken ti kontratista tapno maala ti pammatalgedna a malpas ti kalsada iti naituding a petsa.

Comments are closed.