Footer

Tumulong, saan ketdi a padagsen

MAYSA kadagiti gapu no apay a dakkel ti depisit ti gobierno a pagrigrigatanna ita a pabassiten tapno makalung-aw ti ekonomia ti sobra a magastona no maikumpara iti mapastrekna.

Kas kadagiti opisial ken empleado dagiti nadumaduma a departamento, kaadduanna ti managbaybay-a, barayuboy ken mananggundaway kadagiti benepisio ken pagnam-ayan nga ipapaay ti opisinada.

Iti napalabas, inrusat ti gobierno ti kampania a panagsalimetmet kadagiti nadumaduma a departamento ti gobierno tapno bumassit ti paggastuanda ken adda maagsawda a pundo a mabusbos kadagiti dadduma pay a naipangruna a kasapulan ti gobierno.

Saan a matungtungpal daytoy. Kaarigna ti pammilin a simrek iti maysa a lapayag sa rimmuar iti sabali a lapayag.

Kitaentayo daytoy a pammaliiw:

  • Pannakaaramat laeng kadagiti lugan ti opisina iti opisial a business. Ngem masansan ti pannakakitatayo kadagiti red plate a lugan nga adda iti langlangalang, iti sanguanan dagiti panganan, pagpalpaliwaan, otel, beach resort, galiera ken dadduma pay a lugar kalpasan ti office hours, ken uray pay iti Sabado ken Domingo a kaawan ti opisina. Masansan a makita dagiti annak, asawa wenno mismo nga opisial a nakalugan kadagitoy, ngem saan nga iti official business no di personal a rason.
  • Panagsalimetmet iti kuriente ken danum. Ngem uray iti alas dose ken kalpasan ti retiro, agan-andar pay laeng dagiti bentilador wenno aircon kadagiti opisina agsipud ta naliwayan dagiti empleado (ken uray pay dagiti dadaulo), wenno saan, dagiti empleado ken turayen a saan nga agaw-awid iti balayda ket iti opisinada ti paglutuan, panganan, pagturogan ken pagdigosanda. Makainut dagitoy nga empleado ken opisial iti kaserada ken dagitoy a paggastuan ngem nadagsen nga ibaklay ti opisinada.
  • Panagbiahe dagiti agtuturay iti ruar ti opisinada, ditoy man pagilian wenno iti ballasiw-taaw. Ngem aggurigor dagiti agtuturay, lokal man wenno nasional, a saan nga agbiahe tapno “agpaliiw kadagiti kabaruanan a teknolohia ken wagas ti panagbiag a mabalin nga iwayatda met iti bukodda a pagturayan.” Ti makapadakes, mangikuyogda kadagiti kaaliadoda – pangen dagiti negosiante, NGOs, academe, media– itoy a gannuatda. Lakbay-Aral, kunada, ngem agdadata a junket ta kalpasan daytoy a panagpasiarda a nagobserbaanda kuno kadagiti sabsabali a lugar, awan met ti baro a teknolohia wenno gannuat a maiwayatda para iti pagsayaatan dagiti umili.
  • Naipanurok a panangabuso kadagiti serbisio para iti komunikasion nga ipaay ti gobierno, kas iti telepono, selpon, internet, cable, satellite, telegraph ken radio. Masansan a makapaliiwtayo kadagiti agop-opisina a ti la makitungtungtong iti telepono ti aramidda, wenno saan, makichat-chat iti internet, agdengdengngeg iti radio wenno agbuybuya iti paboritona a programa iti telebision. Paggastuan dagitoy nga ibakbaklay ti gobierno – ken nangruna datayo nga umili. Wen, datayo a taxpayers, agsipud ta datayo ti mangsusueldo kadagitoy nga empleado ken agtuturay.

Makaupay ti pammaliiw nga imbes a tumulong dagitoy nga empleado ken agtuturay iti gobierno nga agsalimetmet, isuda pay ti manggundaway kadagiti serbisio nga ipaay ti opisinada para iti bukodda a pagimbagan.

Hoy, gising! Tumulongkayo iti gobierno, saan ketdi a padagsen!

Comments are closed.