Footer

3 baka, naagab, 1 naipauraga

NARVACAN, Ilocos Sur – Dua laengen a baka ti napasubli ti akinkukua iti natakaw a dingnguenna ta napartin ti maysa.

Segun iti report, natakaw dagiti baka nga aywan ni Cesario Jomar, nga impataraken ni Archiade Serbo, 54, residente iti Pilar, Abra ket da Ittong Casabar, residente iti Gupang, Pilar, Abra ken maysa a managan Junjun, kalugaranna, dagiti masuspetsa.

Mapapati nga inlako dagiti suspek dagiti baka iti managan Rogelio Camarillo iti Dinalaoan, Narvacan, Ilocos Sur.

Natuntonan ni Serbo dagiti dua a baka ken ni Camarillo ngem nailakon daytoy ti maysa iti di nainaganan a residente iti Cagayungan ket naparti payen sa naipauraga.

Insigida a nangisayangkat iti manhunt operation dagiti pannakabagi ti linteg ti Narvacan babaen ti panangidaulo ni PI Elisio Laiz iti maysa a barangay iti Santa Maria, Ilocos Sur a mapapati a yan dagiti kabagian dagiti masuspetsa ngem awandan iti nasao a lugar.

Insubli ni Camarillo dagiti dua a baka ngem kinuna ni Serbo nga agdarum no di mabayadan ti naparti a bakana.