Footer

GSIS, natakuatanna nga adda umaw-awat iti tseke uray natayen ti pensionado

VIGAN CITY – Insardeng ti Government Service Insurance System (GSIS) ti panagipatulodna kadagiti tseke dagiti pensionado agsipud iti natakuatanda nga iregularidad iti panagiwaras iti claim checks.

Daytoy ti impalawag ni Manager Sotero Guerrero, Jr. bayat ti session ti sangguniang panlalawigan itay nabiit kas sungbatna iti naidanon ken ni Bokal Jose Bonuan a reklamo a mapapati a saan a panangbigbig ti GSIS iti authorization letter ti maysa a pensionado nga intedna iti daughter-in-lawna tapno maalana ti tsekena.

Kinuna ni Guerrero nga iti napalabas, ibusbusonda dagiti pension checks iti adres dagiti pensionado ngem idi Hunio 2006, adda pammilin ti opisinada nga impaulog ti senior vice president for operation a saandan a mapalubosan nga agibuson iti claim checks.

“Ti kangrunaan a rason, saan a supisiente ti computerization project ti GSIS a mangtakuat kadagiti iregularidad iti distribution dagiti claim checks,” kinuna ni Guerrero idinto nga innayonna a maysa a natakuatanda, uray natayen ti pensionado, adda pay la mangaw-awat iti pensionna.

Nupay kasta, kinuna ni Guerrero a nakatulong ti computerization iti GSIS a nangtakuat kadagiti iregularidad ket nakainutda iti minilion kalpasan nga insardengda ti panagbayadda kadagiti pensionado a natakuatan a natayen.

Inyunay-unay ni Guerrero nga agsipud ta saan pay a makaumdas ti computerization project, nangiwayat ti opisinada iti iskema tapno personal nga idanonda ti tseke kadagiti pensionado.

Idi Agosto ken Setiembre, mapan alaen dagiti agpenpension ti tsekeda iti satellite office ti GSIS iti Vigan ken Candon, segun iti manager.

“Ti problema ita, adu dagiti pensioner a naidalit ket saanda a makaumay iti satellite office… isu a kadagiti napalabas a bulan, nagpaaramidkami iti written request a personal a bisitaenmi ti pensionado ket mangituding daytoy iti tao wenno miembro ti pamilia nga umay mangala iti tsekena kadagiti sumarsaruno a bulan,” kinuna ni Guerrero.

Kinuna ni Guerrero nga iti ibibisitada iti balay ti pensionado, maretrato daytoy agraman iti tudinganna a mangibagi kenkuana a mangala iti pensionna.

Innayonna a makaanayen ti retrato ken uray awanen ti otorisasion, maalan ti appointed representative ti tseke ti pensionado.

Kinuna ni Guerrero a maala dagiti agnaed iti umuna a distrito ti pension checks iti Vigan City idinto nga iti Candon City ti pangalaan dagiti agnaed iti segundo distrito.

Nupay kasta, mabalin a kiddawen ti pensionado a maiyalis iti satellite office a kayatna a pangalaan iti tsekena, segun ken ni Guerrero.