Footer

Kontrobersial a kontrata

Dakkel a kontrobersia ti pangngeddeng ti Ombudsman nga awan ti nagbasolan da Commission on Elections Chairman Benjamin Abalos, dadduma pay a komisioner ken dagiti ehekutibo ti Mega Pacific Consortium iti poll automation deal.

Rimsua dagiti pammabalaw iti Ombudsman agsipud ta maigidiat daytoy iti pangngeddeng ti Korte Suprema a nangwaswasanna iti kontrata a simrekan ti Comelec ken ti Mega Pacific agsipud ta natakuatanna nga adda serioso nga iregularidad iti bidding ken pannakaiyawat iti P1.3 bilion a kontrata para iti automated a pagbilang a makina a maaramat koma iti eleksion idi 2004.

Maikontra pay daytoy iti takuat ti Senate Blue Ribbon Committee a maanomalia ti kontrata ti Comelec ken ti Mega Pacific.

Kasta met nga adu ti nasdaaw ta ti umuna a resolusion nga imparuar ti panel a natudingan nga agimbestiga iti nasao a banag babaen ken ni Overall Deputy Ombudsman Orlando Casimiro, inrekomendana ti pannakaisaklang ni Commissioner Borra.

Kadagiti kritiko, nakunada nga adu dagiti rumbeng nga ipalawag ti Ombudsman agsipud iti agdadata a panangkidemna kadagiti nadadagsen nga ebidensia maikontra kadagiti opisial ti Comelec.

Ngem iti baet dagitoy a pammabalaw, tinakderan ni Ombudsman Merceditas Gutierrez ti pangngeddeng ti opisinana. Binabalaw pay ni Gutierrez dagiti complainant agsipud ta saanda nga aktibo a nakipartisipar ken dida nagidatag iti ebidensiada iti insayangkat ti Ombudsman a 12 nga aldaw a bista.

Inaramidda laeng kano ti pagrebbenganda kas maibatay iti linteg ken maiyannurot iti pammilin ti Korte Suprema kas maibasar iti ebidensia nga inawatda, panangikalintegan pay ni Gutierrez.

Kinuna met ni Assistant Special Prosecutor Marina Demetrio, miembro ti Casimiro panel a ninamnamada a saan a popular ti pangngeddengda ngem inyunay-unayna a produkto daytoy iti kolektibo a deliberasion ken awan ti natakuatanda a direkta nga ebidensia ti panaglabsing da Abalos ken kakaduana.

Manamnama a dumanon ti isyo iti Korte Suprema.

Ngem ita pay, dakkel ti pammati dagiti agilinlinteg a kaaliado ti agdama nga administrasion nga ayonan ti Korte Suprema ti pangngeddeng ti Ombudsman.

Maysa kano nga independiente a konstitusional nga ahensia ti Ombudsman ket adda iti laksid ti administratibo a kontrol uray ti Korte Suprema.

Yan ti rigatna, saan a maikkat ti suspetsa dagiti kritiko ni Pres. Arroyo nga adda pannakaibiang ti Malakaniang iti daytoy a panagbaliktad ti Ombudsman iti baet ti ididistansia ti gobierno iti nagbalin a pangngeddeng ti Ombudsman.

Ngem sabali manen daytoy a kontrobersia a pagladdetan dagiti kritiko ni Pres. Arroyo kalpasan ti panagkalma dagiti tignay-protesta maikontra kenkuana mainaig kadagiti alegasion ti panagsuitik iti eleksion idi 2004 ken mapapati a pannakaaramat dagiti pundo ti turay para iti kandidaturana iti dayta a panagpipili.

Kasano a mapagtalkan ti Ombudsman a nakaipabaklayan iti pannakaimbestiga iti graft and corruption, no agparparang met a maar-aramat a pangkalub iti kurapsion?

Kasta met a kasano a maannong ti Comelec dagiti pagrebbenganna nga awan ti mayapiring a panagduadua iti sanguanan dagiti kontrobersia a nakaisaanganna?