Footer

Nabartek, napagtripanna nga aircon bus ti mangitulod kenkuana nga agawid

VIGAN CITY – Iti laeng kabangibang nga ili daytoy a siudad ti pagawidan ti maysa a nabartek a lalaki ngem napagtripanna  nga aircon a bus ti mangitulod kenkuana iti balayda.

Sumagmamano kadagiti pasahero a nakalugan iti bus a Partas nga agur-uray iti oras nga agbiahe nga agpa-Manila ti makarurod a makakatkatawa gapu iti ilulugan ni Salvador Rios, 44, baro, residente iti Bantaoay, San Vicente iti rabii ti Oktubre 11 ket kinarintarna ti drayber ken ti konduktor ti bus nga agrubbuatdan ket itulodda iti San Vicente.

Masarakan ti San Vicente aganay a dua laeng a kilometro iti amianan a laud daytoy a siudad idinto nga agpaabagatan ti rota ti bus iti panagpa-Manilana.

Malasin a nakainum ni Rios.

Gapu ta di maanawa ni Rios, timmawag ti management iti police station ket impulongna ti kaadda iti nabartek nga agprobprobokar iti terminal.

Nagresponde dagiti polis ket imbes nga aircon bus, patrol car ti nagluganan ni Rios ken saan a naitulod iti pagtaenganna no di iti police station tapno ditoy a mamunawan.

Kabayatanna, uray alas-otson ti bigat itay Octubre 10 ken adun dagiti aglabas a tattao iti Quezon Avenue ken nagsulian ti Salcedo Street, saan a tubeng dayta iti maysa a nataengan a lalaki tapno isayangkatna ti panggepna a mangtakaw iti landok a traffic signboard a naipatakder iti Quezon Avenue ken nagsulian ti Salcedo Street.

Ngem nakita da Loreto Rabon ken Oscar Reoliquio, agpada a traffic aide, a limmabas iti dayta a lugar, ni Virgilio dela Cruz, 67, naasawaan, residente ti Barangay 3 a mangragragadi iti landok ti signboard ket inarestoda.

Mapapati nga ilako ni dela Cruz iti por kilo ti landok a ragadienna.