Footer

Naglibas ni Boy Kimat! (Maudi a paset)

“N-nadagsen ti pammabasolmo.”

“Ammomin ti motibo ti pammapatay, Mr. Corpuz. Adda relasionyo ken ni Lily ket inyalaam iti apartment. Intedmo amin a kayatna. Gapu iti dayta, nakakaudka iti kaha. Tapno malitupam ti nakaudmo, insegurom ni baketmo. Planom a patayen. Naglibas ni Boy Kimat ket panggepna a balsen ni baketna gapu iti panangliputna kenkuana. Naisipmo a gundawaymon nga iwakas ni baketmo ket ni Boy Kimat ti pangibuntuonam iti pammapatay.”

“Agpayso a nakakaudak iti iggemko a kuarta ngem saan nga umdas dayta tapno patayek ni baketko!” kinuna ni Corpuz.

“Kinapudnona, nagsuspetsaakon kenka iti aldaw ti pammapatay, Mr. Corpuz. No malagipmo, kinunam a binurak ni Boy Kimat ti sarming tapno magaw-atna ti lelettatan ti ridaw iti uneg. Ngem iti panangamirisko, naiwarsi dagiti buong ti sarming iti ruar ti tawa ken iti dalan. Ania ti kayatna a sawen? Adda iti uneg ti balay ti nangburak iti sarming! Agdadata ngarud a nagulbodka. Sika ti nangburak iti sarming ket pinagparangmo nga aramid ni Kirat!”

“Agkarkarawaka iti angin!”

“Kinunam pay a sakbay ti alas dose idi sumangpetka iti balaymo ket nadatngam ni baketmo a naidasay. Pinaleknaka ni Boy Kimat. Ngem kinaagpaysona, sika ti nangpalek iti ulom. Inaramidmo dayta tapno mayadayo kenka ti suspetsa. Ngem malasmo. Iti dayta a kanito, adda ni Boy Kimat iti Salindeg, barangay nga adda iti lumaud, innem a kilometro ti kaadayona iti Raois, kaadaywan a barangay iti daya ti siudad, a nanghold-ap iti maysa a traysikel ket kinurimesna ti kuarta ti drayber ken ti pasaherona sana intaray ti lugan.”

“Saan a pudno dayta!” namigerger ti timek ni Mario Corpuz.

“Ngem patalgedan dagiti pasamak nga adayo ni Boy Kimat iti crime scene ket uray no pakaskasenna ti intarayna a traysikel, awan a pulos ti posibilidad a makagteng iti Raois iti sakbay ti alas dose. Mapatalgedanmi dayta ta kagapgapumi iti Salindeg a nagsaludsod iti babai a tinakawanna. Ngarud, no saan a ni Boy Kimat ti nangpaltog ken ni baketmo, sabali ngarud a tao. Sika ti itudtudo dagiti pammaneknek!”

“Saannak nga abogado ngem puro conjectures laeng ti ibagbagam.”

“Daytoy pay, Mr. Corpuz. Idi naglibas ni Boy Kimat, sinursurotmi ti nagdalananna. Nagna iti Tamag, nagpa-Salindeg, sa nagturong iti laud a direksion. Imbatina ti traysikel nga intarayna iti Paratong. Iti pumarbangon, nagkallong iti balay ni Adelina Almachar sana innala ti bado ken pantalon ti akimbalay. Adda saksi, maysa a Marcos dela Cruz, a nakakita kenkuana a naggapu iti paraangan dagiti Almachar.”

“Ania ti koneksion dagita iti pannakapapatay ni baket?”

“Nalawag a saan a daya no di laud ti rota ni Boy Kimat. Nalawag nga iti kasera ni Lily ti turongna. Saan a pulos nga immammingaw iti daya a barangay, nangnangruna iti Raois a nakapapatayan ni baketmo.”

Saan a nagtimek ni Corpuz. Nanindi ketdi.

“Ngem daytoy ti mangsirut iti tengngedmo, Mr. Corpuz. Adda pamalpalatpatam iti ballistics? Tapno ammom, ti paltog, kas met iti tangan nga agduma ti lemmana. Pinaamirisko ti bala a naala iti bagi ni baketmo ken ti bala ti paltog ti guardia a pinaltogan ni Boy Kimat idi naglibas iti pagbaludan. Saanda nga agparis. Kaparisna ketdi ti lemma ti bala a nanggudas ken ni Ditas ken Diango ken ti bala a naipaltog kaniak idi sinurotmi ni Lily iti apartment.”

“Saan a pudno dayta!”

“Idi damo, diak maawatan no apay nga agparis ti lemma ti bala ti paltog a nangpatay ken ni baketmo iti lemma ti bala ti paltog a nangpatay kada Alias Diango ken naiputok kaniak. Maymaysa laeng ti kayatna a sawen dayta. Paltog ni Boy Kimat nga adda iti ikut ni Lily ti naaramat iti dua a krimen. Ngem kasano a naaramat ti paltog a nanggudas ken ni baketmo idinto nga adda ni Boy Kimat iti laud a barangay? Adda iti ikutmo ti paltog. Linibasmo la ketdi nga innala iti apartment ni Lily. Ni laeng Lily ti yan ti tulbek. Sika laeng ti adda gundawayna a makaiggem iti paltog.

“Kalpasan ti panangpataymo ken ni baketmo, insublim ti paltog iti apartment. Daksanggasat ta nakitanaka ti akinkukua ti apartment iti dayta a rabii. Ken malasmo ta pinaala ni Boy Kimat ti paltogna ket daytoy ti inaramatna a nangpatay ken ni Alias Diango ken ni baketna. Iti dayta nga inaramid ni Boy Kimat, limtuad ti kaadda iti dua a nagsina a krimen.”

“Agkarkarawaka…”

“Impakitami iti baket nga akinkukua iti apartment ti ladawan ni Boy Kimat no isu ti nakitana nga immamingaw iti apartment ngem insungbatna a sabali. Sika dayta, Mr. Corpuz. Kapkapnekanmi a no isarangdaka iti baket, mabigbignaka. Dayta met ti mangpatalged nga adda kenka ti oportunidad a nangala ken nangaramat iti paltog.”

Limmusiaw ti rupa ni Corpuz.

“Iti dayta a rabii nga ipapanmo iti apartment ni Lily, adda nga aglemlemmeng ni Boy Kimat iti dati a kasera ni Lily. Paneknekan dayta da Carla ken dagiti alagana a babbai. Awan ti pannakaammo ni Boy Kimat nga adda relasionyo ken ni Lily. No ammona, sigurado nga impaalnawna met ni Lily. Ngem ni Lily ti koneksionmo iti krimen. Ti paltog ni Boy Kimat nga iduldulin ni Lily ti nanglukais kenka.”

“All hot air…”

“Kasano nga ammok dagitoy?” pinerreng ni Jessie ni Corpuz. “Tapno ammom, nagkantan ni Lily. Impudnona a sika ti nangplano iti amin.”

“Imposible dayta! Awan ti nagpatpatanganmi ken ni Lily a plano no aniaman dayta.”

Napaisem ni Jessie. “Ala wen, sika laeng ti nagplano!” kinunana. “Ngem mapaneknekan ni Lily nga ammom nga iduldulinna ti paltog ni Boy Kimat. Malaksid iti dayta, sigurado a patalgedan ni Lily a timmawagka kenkuana ket naammuam ti naglemmenganda ken ni Boy Kimat. Sika la ketdi ti nangitimbre iti impormasion iti polis. Dayta ti mangsirut iti koneksionmo iti krimen.”

“Saan a pudno dayta!”

“Tapno ammom, adda ni Lily iti kotse. Kayatmo a makita?”

Saanen nga inuray ni Jessie ti sungbat ni Corpuz. Tinawaganna ni Melvin.

“Kuyogem ni Lily a sumrek iti balay,” kinunana.

Kasla naupran iti suka ti rupa ni Corpuz idi mataldiapanna ni Lily nga ak-akayen ni Melvin nga agturong iti balay. Arig napaksuyan a nangipusot iti bagina iti sopa.

“Naduktalan ni baket ti kaadda ti relasionmi ken ni Lily. Nagringgorkami. Diak inggagara a patayen ni baket….” naburak ti timekna.

Comments are closed.