VIGAN CITY –  Inkalintegan ni P/Supt. Maximo Torricer, hepe ti polis ditoy, a “saan nga agraira dagiti mapaspasamak a panagtakaw itoy a siudad.”

Daytoy ti reaksion ni Torricer iti alegasion ken pananglagidaw nga imbaskag ni Konsehal Alfredo Figuerres, Jr. maipanggep iti aramid a panagtakaw ditoy siudad.

Linagidaw ti konsehal ti panagraira ken adun dagiti saan a masolsolbar nga insidente ti panagtakaw iti siudad a kas maibasar iti police blotter.

Inimbitaran ti Konseho ni Torricer tapno lawlawaganna ti agdama a situasion  mainaig iti peace and order iti siudad.

Sakbayna, kinuna ni Vice Mayor Franz Ranches a saan nga agraira ti panagtakawan iti Vigan City.

“No agraira, kunatayo, kasla general rule a kasta ti mapaspasamaken… iti panagkitatayo, isolated cases a nairana laeng a nagsasaruno,” kinuna ni Ranches iti pannakipatpatang ti Tawid News Magasin kenkuana iti opisinana itay nabiit.

Iti met biang ni Konsehal Germie Goulart, no agraira a kuna, kayariganna iti situasion idi tiempo dagiti sakasaka.

Kinuna pay ni Ranches nga idi dinamagna iti city prosecutor’s office no agraira wenno ngimmato ti insidente ti panagtakawan iti siudad, insungbatda a “saan met a kasdiay a makaalarma ket no adda man, saan a daydiay kunatayo a panagraira.”

“Adda dagiti mabilbilang a kaso ngem saan met a makaalarma ta isolated cases pay laeng,” inlawlawag ti bise mayor kas reaksionna iti imbaskag ni Figuerres.

“Saan a pudno nga agraira ti aramid a panagtakaw iti siudad ti Vigan. Isolated cases laeng ti kaaduan nga insidente ken adda dagiti nasolbar ta adda metten dagiti sumagmamano a natiliw a suspetsa iti panagtakaw,” kinuna ti pangulo ti kapolisan iti Vigan.

Impakammo pay ni Torricer a ti pagaduan no dadduma dagiti nakalanad nga insidente ti panagtakaw iti police blotter gapu ta ipa-blotter dagiti biktima ti napukawda a selpon tapno maipaneknekda iti pamiliada a natakaw nga agpayso dagiti alikamenda.

Inlawlawag pay ti hepe a maysa met a factor ti kinabassit ti bilangda a polis idinto nga inannugotna a daytoy ti maysa a rason a pagkapsutan ti puersada.

Iti laksid nga adda nakainstolar a tele-eye kadagiti maibilang a crime-prone areas iti siudad, saan a makuna nga epektibo dagitoy ta saan met nga ammo dagiti polis ti mang-operate iti nasao a device, segun pay laeng iti hepe.

Impanamnama met ni Torricer ti panang-maximize ken panangprubetiar ti kapolisan kadagiti barangay tanod ti Vigan a kas naisingasing ken ti panangpasublida iti footpatroling.

“Kasapulan ti nayon a personnel ti Vigan PNP,” inkiddaw ti Hepe kadagiti kameng ti Konseho.