Footer

Salomague port, napateg iti turismo, pannakaibiahe iti kargamento – Sek. Yap

SANTA, Ilocos Sur – Kinuna ni Presidential Management Staff Sec. Arturo Yap a tinudingan ni Pres. Arroyo a pointman wenno development champion tapno masigurado a maipatungpal agingga iti 2010 dagiti naipangruna a programa ti turay.

“Immaytayo tapno kitaentayo dagiti dadakkel nga infrastructure projects ni Pres. Arroyo a talaga a kritikal kadagiti programana,” kinuna ni Yap idinto a dinakamatna dagiti nadumaduma a proyekto kas iti power projects ken ti Laoag International Airport iti Ilocos Norte ken ti Banaoang Pump Irrigation Project ken ti Salomague Seaport iti Cabugao, Ilocos Sur.

Ni Yap ti tinudingan ni Pres. Macapagal-Arroyo a mangkita kadagiti proyekto ti North Luzon Agribusiness Growth Quadrangle a buklen ti Ilocos Region, Cagayan Valley ken Cordillera.

Iti SONA ni Pres. Arroyo, inwaragawagna ti pannakaipasdek dagiti super regions iti intero a pagilian para iti panagdur-as ti ekonomia.

Iti panangsarungkar ni Yap iti Halsema Highway project itay nabiit, impatalgedna ti naannayas a pannakaipatungpal dagiti proyekto iti North Luzon Agribusiness Growth Quadrangle.

Tallo a probinsia, ti Benguet, Mt. Province ken ti Ifugao ti mabenepisiaran iti nasao a proyekto a manamnama a manglukat iti merkado kadagiti agmulmula ken mangawis iti pannakaipasdek dagiti ad-adu a negosio.

Kinuna ni Yap a naipakumit kenkuana ti pammilin a mangkita iti nasayud a pannakaipatungpal dagiti proyekto iti super region a pakairamanan ti Halsema Highway, ti Banaoang Pump Irrigation Project iti Ilocos Sur, ti Agno River development project a mangsaklaw iti Cordillera ken Pangasinan ken ti Casecnan dam project iti Nueva Ecija.

Binisita ni Yap dagiti dadakkel a proyekto iti Ilocos Sur itay Oktubre 11 kas iti PGMA Multiline Food Processing Plant, Banaoang Pump Irrigation Project ken ti Salomague port iti Cabugao, Ilocos Sur.

Nagturong iti Ilocos Norte iti kabigatanna tapno bisitaenna dagiti power projects ken ti Laoag International Airport.

Kinuna ni Yap a nasurok a P5 bilion ti nailatang a pundo iti BPIP “ket padanuman daytoy dagiti kataltalonan iti District I (ti Ilocos Sur) a mangbenepisiar iti nasurok a 30,000 a mannalon.”

Innayonna a napateg iti turismo ken pannakaibiahe dagiti kargamento ti pannakaipasdek ti Salomague seaport.

“Gapu ta addan puertoyo, ad-adda pay a mapapigsayo ti agri-production iti Ilocos Sur,” kinuna niYap idinto nga indagadagna nga ipuntiria ti panaglako iti Taiwan, China ken North East agsipud ta napimpintas ti matgedan kadagitoy a pagilian.”

Binisita met itay nabiit ni National Irrigation Administration head Arturo Lumibao ti Banaoang Pump Irrigation Project.

Comments are closed.