Footer

Ubing, binagbagsol ti kaarrubada

CANDON CITY –  Nakaam-ames ti pannakapapatay ti maysa nga ubing manipud iti ima ti kalugaranda iti barangay Calongbuyan ditoy.

Nagsagrap iti 11 a bagsol ti biktima a nabigbig iti nagan a Rose May Gaoat, 6, Grade 1, manipud iti masuspetsa a ni Nelson Valdez, 33, dati nga overseas Filipino worker manipud iti Greece, ken agnaed iti nasao met laeng a lugar.

Naammuan iti inbestigasion a matmaturogen ti pamilia ti biktima iti dayta a rabii, idi mariingda iti panangbagbagsol ti suspek iti ruanganda babaen ti natadem a banag.

Mapapati a ti ama ti biktima ti puntiria ti suspek.

Segun iti inbestigasion,  binagkat ti suspek ti ubing sana intalaw.

Nasarakan ti ubing iti tengnga ti taltalon nga awanen ti biagna gapu iti lima a bagsol iti tian ken barukong ken innem a bagsol iti likudna.

Simmuko ti suspek iti kabigatanna.