Footer

Adda maragsakan, adda maldaay

Adu ti nakaanges iti nalukay kalpasan nga inkeddeng ti Court of Appeals a saan a nasaknap ti leakage ti board examinations dagiti narses ket saan nga ageksamen manen dagiti nakapasa.

Ngem sigurado a di naragsakan dagiti examinees iti Metro Manila ken Baguio a napan nagatendar iti final coaching nga insayangkat ti Gapuz, Inress ken Pentagon review centers agsipud iti pammilin ti Korte nga ageksamenda manen iti Test III ken V.

Dinayaw ti Alliance of New Nurses (ANN) ti pangngeddeng ti CA a mangipalubos iti 16,000 a nakapasa iti eksamen nga agsapatadan ken awatenda ti lisensiada nga ag-practice.

“Kayatmi ti umaddangen ken maikkanen iti paggibusan daytoy a kontrobersia,” kinuna ni Renato Aquino, Jr., presidente ti ANN.

Ngem nalidayan la ketdi dagiti 1,687 nga examinees a naiwaragawag a nakapasa kalpasan a saan a binigbig ti Korte ti recomputation nga inwayat ti PRC. Dagitoy ti imbilin ti Korte nga ageksamen manen.

Kabayatanna, ragsak la ketdi ti narikna met dagiti 1,200 nga orihinal a nakapasa a bimmaba ti ratingda gapu iti recomputation ti PRC agsipud ta imbilin ti Korte a mabalindan ti agsapata ken umawat iti lisensia.

Di bumurong a naragsakan unay ni PRC Chair Leonor Tripon-Rocero ta sinarurongan ti Korte ti pagtaktakderanna a “no retake”, kasupadi iti impagpagna dagiti binirngasanna iti “intruder” kas kada Dante Ang, chair ti Commission on Filipino Overseas ken ni Labor Secretary Arturo Brion.

Iti sabali a bangir, nakaanges metten iti nalukay ti Malakaniang gapu iti “panangisalakan” ti Korte tapno saan nga agsarapa pay kadagiti pammabalaw kalpasan ti panagbaliwbaliw ti pagtakderanna mainaig iti kontrobersia.

Ta idi damo, kinunana nga awan ti retake, sa idi kuan, imbilinna ti panageksamen manen dagiti examinees, ket idi rimsua dagiti protesta, imbagana nga urayenna pay ti desision ti Korte sakbay nga ibilinna ti retake. Ita, nagdesision ti korte.

“Maiyannatop ti pangngeddeng (korte) iti naipakumit iti Presidente a pammilin a mangdusa kadagiti nakabasol ken mangilisi kadagiti inosente. Ammotayo amin a sensitibo ti Presidente iti pakaseknan dagiti nagannak kadagitoy nga examinees,” nakuna pay ni Executive Sec. Eduardo Ermita.

Kabulon ti yaanges dagiti nagannak iti nalukay, kinunada a kasapulan a marikpanen daytoy nga isyo. Dakkelen ti mantsa nga intedna iti nursing profession ket panawenen tapno umaddang metten dagiti apektado a nars a mangtunton iti kaikarianda iti daytoy a lubong.

Ngem anian ta iti aldaw a panagsapatada, pinaitantan ti Malakaniang idinto a kinunana nga urayen pay ti dua a lawas kalpasan ti desision ti CA tapno agbalin a final ken executory ti pammilin.

Nagtungpal ti ragsak iti nakaro a pannakauppapay manen dagiti nakapasa. Imbes a nalukayen ti barukongda, babantot ti imetda a naggawid.

Sumangkautro, nangipila dagiti grupo a mangipagpagna iti retake iti rekonsiderasion iti pangngeddeng ti CA.

Ti saludsod: kaanonto nga agpatingga iti panagsagaba dagiti nars a nageksamanen idi 2005?