Footer

Iti Vigan City, adda pay lugar nga awanan elektrisidad

VIGAN CITY – Iti baet a maysan a naprogreso a siudad a daydaywen dagiti turista gapu kadagiti daan a pagtaengan a naipatakder pay la idi panawen dagiti Kastila ken dagiti produktona kas iti empanada, okoy, longganisa, bagnet ken dadduma pay, adda pay la paset iti dumaya a barangay ditoy nga awan pay ti elektrisidadna.

Limtuad daytoy kalpasan a nangidatag ni Konsehal Alfredo “Jun” Figuerres iti resolusion a mangkiddaw ken ni Mayor Ferdinand C. Medina a mangilatang iti P50,000 kas counterpart ti city government tapno masilawan ti akin-abagatan a paset ti Barangay Rugsuanan ditoy.

Naammuan a makabusbos ti Ilocos Sur Electric Cooperative iti P94,132.88 para iti bill of materials a maaramat iti pannakasilaw ti nadakamat a lugar ket inannugot ti ISECO a dida kabaelan isu a kidkiddawenda nga ibaklay ti gobierno ti siudad iti kagudua iti mabusbos iti daytoy a gannuat.

Ngem sumagmamano a konsehal ti saan a kumbinsido a saan a kabaelan nga ibaklay ti ISECO ti gannuat. Mamati ni Konsehal Ever Molina nga adda pangalaan ti kooperatiba a pundo para iti bill of materials tapno masilawan ti nasao a lugar agsipud ta adda missionary charge a masingsingir kadagiti consumers.

“Kabaelan ti city government nga ited ti P50,000 ngem apay a mangtedtayo idinto a mainayon met dayta nga asset ti ISECO?” kinuna ni Konsehal Germie S. Goulart.

Gapu kadagitoy a rimmuar nga isyo, naitantan pay laeng ti pannakatratar ti nasao a resolusion.

Iti kallabes, naisalpika ni Figuerres, kakaisuna a kameng ti oposision, a maparparigatan dagiti gakatna a lumsot iti konseho.

Ngem insungbat ni Vice Mayor Ranches a saan a pudno ti alegasion ni Figuerres agsipud ta ipakita ti rekord nga adu metten impasa ti konseho a gakat ti nasao a konsehal.

Comments are closed.