Footer

$6,000, insangpet ni Mayor Zaragoza para iskolars iti Narvacan

NARVACAN, Ilocos Sur –   Agdagup iti $6,000 ti inted a tulong dagiti Amerikano ken Narvacaneo manipud idiay Grover Beach City, California para kadagiti iskolars ti Narvacan Association of Central California (NACC).

Daytoy ti impakaammo ni Mayor Edgar Zaragoza bayat ti pannakiuman kenkuana ti DZTP ken Tawid News Magasin itay nabiit.
Kinuna ti mayor a naisangrat ti kuarta iti scholarship program ti nasao a grupo para kadagiti mamasirib ngem marigrigat nga estudiante nga agnaed iti daytoy nga ili.

“Adda manen maited nga scholarship fund para kadagiti 21 nga agdama nga scholarstayo,” kinuna ni Zaragoza.

Impakaammo pay ti mayor nga iti daytoy a tawen, pito ti agturpos a nursing students idiay UNP, ket manamnama ti idadar-ay dagiti nangtultulong kadakuada nga Amerikano nga aggapu iti Grover Beach tapno imatanganda ti panagturpos dagitoy .

Iti panagturpos dagiti pito nga iskolars, masuktanda iti sabali manen nga iskolars a tulongan ti NACC, kinuna ti mayor.

Maipalagip a tinawen a maik-ikkan iti financial assistance dagiti marigrigat ngem mamasirib nga estudiante iti Narvacan babaen ti suporta dagiti Amerikano ken Narvacaneo a residente itan iti Grover Beach.

Tinawen met nga adda um-umay nga Amerikano a mangimatmaton iti NACC tapno imatanganda ti panaggraduar dagiti inesponsoranda nga agbasa iti kolehio.