Footer

Agtultuloy iti pannuot dagiti mahistrado

Nagtimeken ti Korte Suprema: imbasurana ti petition ti Sigaw ng Bayan ken ti Union of Local Authorities of the Philippines a nangkiddawanda iti Nangato a Pangukoman nga ipalubosna ti pannakaamendar ti Konstitusion babaen ti people’s initiative.

Maikur-itto iti historia daytoy a pangngeddengda agsipud ta nakasadag ditoy ti direksion a turongen ti pagilian.

Napigsa ti pressure, kas panangannugot ni Chief Justice Artemio Panganiban. Uray saan a kayat nga ibaga ni Panganiban ti pagtaudan dagiti pressure, adda pamalpalatpatan dagiti kontra iti Cha-Cha iti adda iti likudan dagitoy – ti Malakaniang ken ti Kamara.

Iti SONA ni Pres. Arroyo, impakdaarna a ti agdama a sistema ti gobierno ti lapped iti panagdur-as ti pagilian ket rebbengnan a masuktan ti porma ti gobierno manipud iti presidensial iti parliamentaria.

Ti met panagbalin a parliamentaria ti porma ti gobierno ti nabayagen nga idagdagadag ni House Speaker Jose de Venecia.

Ti people’s initiative ti makita ti Malakaniang ken ni de Venecia a kasayaatan a wagas a panangiduron iti charter change agsipud iti saan a panagdur-as ti tignay a mamagbalin iti Kongreso a constituent assembly gapu iti saan nga ikakanunong ti Senado. Nupay adda met ti constitutional convention, mapaliiw a saan nga interesado ti pro-Cha-Cha a mangiduron daytoy agsipud ta kunada a dakkel ti magastos. Ngem ti dida iyeb-ebkas, narigrigat a magemgeman dagiti mabutosan a manggamulo iti Konstitusion.

Nupay naidumudom ti kiddaw ti ULAP ken Sigaw ng Bayan iti Comelec nga ikkanna iti otentikasion dagiti pirma a naukkonda a mangpetision iti panagsukat ti agdama a presidensial a sistema iti parliamentaria agsipud iti panangibasura ti poll body iti petision agsipud ta kunana nga awan ti kanayonan a linteg nga impasa ti Kongreso a mangiyimplementar iti people’s initiative, di napekka ti pinget dagiti dua a grupo ket indatagda ti petisionda iti Korte Suprema.

Ipaspasindayag ti Sigaw ng Bayan a nakaukkonda iti 6.3 milion a pirma ket sangkakunada a rumbeng a taliawen ti Korte Suprema ti “timek” dagiti umili iti panangtratarda iti petisionda. Ngem kinuna ti Nangato a Pangukoman a  mapagduaduaan ti integridad dagiti naukkon a pirma, saan nga ammo dagiti tattao no ania ti pinirmaanda, ken napataud babaen ti manipulasion dagiti addaan iti naun-uneg nga interes.

Ngem nupay nagballigi dagiti kontra Cha-Cha iti daytoy a rupak iti Korte Suprema, saanda koma a kampante unay agsipud iti kinarisiris ti resulta ti panagbutos dagiti mahistrado.

Manamnama nga agipila dagiti grupo a pro-Cha-Cha iti mosion para iti konsiderasion ket posible nga adda maawisda a mahistrado nga agbaliktad. Addan napasamak a kastoy iti kallabes a binaliktad ti Korte Suprema ti immuna a pangngeddengna.

Ala, pinaneknekan ti Korte Suprema a saan a naapektaran kadagiti  pressure ket dida nagkir-in a nangtratar iti petision ti people’s initiative a kas kadagiti naglasat kadakuada a high-profile cases. Ngem kayat man wenno saan dagiti mahistrado, agtultuloy a sumangoda iti  pannuot iti pagrebbengan ken kinataoda agsipud iti saan a panagpakumbaba dagiti mangidurduron iti charter change babaen iti people’s initiative iti desision iti Korte Suprema.

Siputantayo dagiti sumarsaruno a pasamak, kakailian.