Footer

Bataoil, kabarbaro a PNP PROI Regional Director

CAMP BGEN OSCAR M FLORENDO –   Ti pabalay dagiti soldado ti prioridad a programa ti kabarbaro a regional director ti Region I.

Daytoy ti impatalged ni dati a Northern Police District Police Chief Supt. Leopoldo Bataoil kabayatan ti simple a turn-over ceremony a naangay ditoy itay nabiit.

Pormal a nagtugaw ni Bataoil a kabarbaro a regional director ti PNP Region I kas sukat ni Police Chief Supt. Alfredo de Vera Jr. a nagretiro idi Setiembre 20 iti daytoy a tawen.

Inallawat ni Bataoil ti pagrebbenganna manipud ken ni Deputy Regional Director for Administration Police Sr. Supt. Nicanor Casaclang a nagpaay a kas officer in charge iti regional command kalpasan ti panagretiro ni de Vera.

Natibo ni Bataoil iti Lingayen, Pangasinan.  Sakbay a nadutokan iti kabarbaro a puestona, nagserbi kas provincial director ti Pangasinan idi 2001, nagserbi a PRO1 chief, naiyakar iti Quezon City Police District  kas deputy director sa nagpaay nga spokesperson iti tallo a kaudian a nagtakem a hepe ti PNP a pakaairamanan ni Gen. Arturo Lumibao.

Inyendorso dagiti politiko ken non-government organization iti rehion ni Bataoil maigapu iti napintas a rekord ti serbisiona.