Footer

Del Pilar, umad-adu ti pumasiar a turista

GREGORIO DEL PILAR – “Dumurdur-as ti turismo ditoy gapu iti Tirad Pass National Park ti kangrunaan a pakabigbigan ti ili.”

Daytoy ti impalgak ni Mayor Gilbert Ciriaco kabayatan iti interbio kenkuana ti Tawid News Magasin itay nabiit mainaig iti gannuat ti gobierno munisipal a mangawis iti ad-adu a turista a sumarungkar iti ilida..

Kinuna ni Ciriaco nga adun dagiti turista a naisarsar-ong iti Tirad Pass iti summer ken uray pay iti tudtudo ket adda pay dagiti puraw a magna a mismo iti Tirad Pass National Park sada agturong iti Quirino sada lumasat iti Cervantes nga agturong iti Mountain Province.

Kinunana nga aggapu iti Sagada dagiti dadduma a turista sada lumasat iti nasao a parke.

Iti Tirad Pass ti nakapasamakan ti nadara a bakal iti nagbaetan dagiti puersa dagiti Amerikano ken ti revolutionary forces nga indauluan ni Gen. Gregorio del Pilar. Ni del Pilar ti tinudingan ni Emilio Aguinaldo a manglapped kadagiti Amerikano iti panagpaknina iti Isabela kabayatan ti panangsunson dagiti puersa nga Amerikano.

Kanaig daytoy, inrusat ti municipal government ditoy ti panakapigsa ti turismo babaen iti panakarehabilitar ken pannakapapintas kadagiti kangrunaan a tourist spots iti ilida. Malaksid iti agdindinnamag a Tirad Pass a nakatayan ni Heneral Gregorio del Pilar, ti Sibol Hot Spring ti maysa pay kadagiti kangrunaan a destinasion dagiti turista ditoy.

“Madama ti pannakasemento ti kalsada nga agturong iti Sibol tapno nadardaras ken nasimsimpa ti panagdaliasat dagiti turista,” kinuna ni Ciriaco.

Innayon ni Ciriaco a kalpasan ti pannakapapintas ti marker ken monumento ni del Pilar, panggep pay ti ili ti panakabangon kadagiti resthouse ken pannakakonkreto ti paggianan ti danum.

“Madama pay ti beautification ken panagmulmulami iti aglawlaw ti Tirad Pass Park, ket no mabakasanton ti daan a municipal buildingmi, daytoyton ti kangrunaan a pangipananmi nga umianan dagiti umad-adu a turista,” kinuna ti mayor.