Footer

Dua a daniw

Adayo kadin ti masakbayan a sapsapulek
Nanginan ti lana a saksakduek?
Adda ngata pay katukad ti binting
Listaan, gagatangen nga atiddog?

Ni Danilo C. Caburian
Balawarte, Agoo, La Union

1. TI IGAM ITI GUBAT ITI MASAKBAYAN

Adayo kadin ti masakbayan a sapsapulek
Nanginan ti lana a saksakduek?
Adda ngata pay katukad ti binting
Listaan, gagatangen nga atiddog?
Naet-eten barikes ‘toy siket
Aniat’ aramidek tapno di magsat?
Diosko, pasimbengem panunotko
Tapno diak maiwawa iti dalanko,
Dim’ itulok nga agbalinak a daksanggasat
Gaput’ maipapaidamen nga ayat.
An-anusakon a gaudan ‘toy bilog
Ipasaksakko iti taaw a nadaeg.
Ammok nga addanto latta supapak
Mangipaay rag-o toy kararuak!

2. TI KARNAL TI NAIBILAG NGA IRIK

natagapulotan isemmo
ta makitam ti bun-as
namsek ti bagas ti irik
a nayaplag kainaran
bunga ti saldetmo a nagsukay
ken bulnosmo metten nakitaltalonam.
ditoy, nainaw dagiti arapaapmo
ti paglakoam, mapabaromon
ti agir-iray a pagtaengam
agbalinen a bato, saanton a kabaelan
a rebbaen iti no mano a bagyo
awanen sapulem pay itoy a biag
nasaliwanwanen pamiliam, naragsakkan
(banag a naipaidam idi kadakayo;
ti rigat isut’ nangiduron
tapno inkay agsalukag,
no labsen ti mannarita,
abakyo pay iti agpalpalama!)
ngem natakuatam ti maysa a kinapudno
nagkallatik iti isipmo ti subad
no aniat’ immula isut’ apiten
dagiti marmarna a mabingbingayam;
kasta met ti bingay nga inka ipapaay
nagsiddukerka naalliaw
ti bukodmo a suksukayen
adda kaduam nga anniniwan!