Footer

Nagpukaw a barangay captain, nakaawat iti death threat

CANDON CITY –   Impeksa ti pamilia ti nagpukaw a kapitan ti barangay ditoy ti panagamakda nga addan dakes a napasamakna kalpasan ti dua a lawasen a dina panagawid.

“Uray bangkayna laengen, basta makitami ni tatangmi!” daytoy ti kinuna ni Oroposa Galicia Golar, anak ni Kapitan Laureano “Berto” Galicia, Barangay Captain iti Tablac, Candon City, idi nagpanawagan manen daytoy iti DZTP Radio Tirad Pass.

Impakaasi ni Galicia-Golar kadagiti kailianna nga ipakaammoda kadakuada no adda man impormasion nga ammoda para iti pannakatunton ti amada idinto a dinawatna ti tulong ti asinoman a nakakita no asino ti naudi a kinakuyog ti amada wenno tao a nangala kenkuana agsipud ta madanaganda unayen iti saan met laengen a panagawid ti amada.

Naammuan ti Tawid News Magasin nga immulog ni Kapitan Galicia iti pagtaenganda iti agsapa ti Oktubre 13, Biernes, ngem saanen a nagawid sipud dayta nga aldaw.

Awan met ti tawag wenno pakaammona iti pamiliana iti dayta a panagpukawna.

“No pinapapatayda man, uray bangkayna la koman nga ipatuldoda tapno dikami madanagan unay,” kinuna ni Galicia-Golar kabayatan iti interbio kenkuana.

Sakbay ti panagpukawna, nadakamat ni Kapitan Galicia bayat ti interbio kenkuana ti DZTP nga adda naaw-awatna a death threat.

Iti pannakipatpatang ti Tawid ken ni Bokal Robert Tudayan, kinumpirmana nga adda death threat a naawat ni Kapitan Galicia.

Impalgak pay ti bokal a sumagmamano pay a barangay captain iti siudad ti Candon ti nakaawat met iti death threat.

Nupay kasta, nagkitakit ni Tudayan a mangibaga no sino ti suspetsaenna a nangipatulod iti death threat a naawat ti nagpukaw nga opisial ti barangay.