Footer

4 naiyanud iti baybay, 3 nalmes

MAGSINGAL, Ilocos Sur – Dua a babbalasang ken maysa a baro ti nalmes bayat ti panagdidigosda iti kabaybayan a sakup ti maysa a barangay ditoy, itay nabiit.

Nainaganan dagiti nalmes a da Clarissa Utrera, 19, nursing student iti Northwestern University, Laoag City, residente iti San Ramon; Girlie Bautista, 15, agnaed met laeng iti nasao a barangay; ken ti kaduada a baro, ni Regino Ullero, 20, residente ti San Vicente, Magsingal.

Nakalasat ti sabali pay a kalugaranda, ni Gretchen Bautista, 17, balasang.

Segun iti report, napan nagpipiknik idi Sabado, Oktubre 28, dagiti tallo a babbalasang a kaduada ni Ullero iti igid ti baybay ti Bantay Buneng, Manzante, ditoy.

Bayat ti panagdidigosda, mapapati a ginuyod ida nga impataaw ti napigsa a koriente.

Immarayat dagiti sumagmamano a residente ditoy ket naalawda da Utrera ken Gretchen ngem saandan a nakita da Ullero ken Girlie.

Naitaray da Utrera ken Gretchen iti ospital ngem naideklara a natayen ni Utrera.

Narekobre iti alas 5 ti malem ti Domingo ti tumtumpaw a bangkay da Ullero ken Girlie iti kabaybayan a sakup met laeng daytoy nga ili.