Footer

Agtutubo, nagrarambol

CANDON CITY – Tallo nga agtutubo ti nagriringgor iti maysa a panganan ditoy gapu iti dati a susikda.

Nabigbig dagiti tallo a da Ednel Quiba, 20, ti kabsatna a ni Edmund, 18, agpada nga agnaed iti San Agustin iti daytoy a siudad, ken ni Nixon Telan, 16, residente iti Poblacion, Galimuyod, Ilocos Sur.

Iti inisial nga imbestigasion ti polis, naammuan nga agmermerienda da Telan ken di nainaganan a kaduana iti maysa a mami stand nga asideg iti plasa idi lumabas da Ednel ken Edmund.

Idi makita dagiti agkabsat ni Telan, kinomprontada daytoy mainaig iti napalabas a ririda a nagtungpal iti panagkakabilda.

Mapapati nga inruar ni Telan ti patademna nga agatiddog iti 16 a pulgada ket inarmaranna dagiti agkabsat ngem naagaw ni Ednel.

Simmangpet dagiti polis ket tinengngelda dagiti tallo sada impan iti police station. Nagtuloy latta ti panagsubang dagiti tallo ket inkulong dagiti polis ida tapno madisiplinada.

Kabigatanna, napalubosan met laeng dagiti tallo kalpasan a nagpapatang ken naglalamanoda. Nagkarida a didanton uliten ti napasamak.

Comments are closed.