Footer

Dakkel ti akem ti barangay kontra terorismo

SAANEN a mabalin nga ibarengbareng ti pangta ti terorismo iti pagilian. Nagtagilangan daytoy a dakkel a problema iti urnos ken talna ken iti seguridad dagiti umili.

Umad-adu ti bilang dagiti biktima iti terorismo ditoy pagilian. Madakamat ti pannakapabettak ti bomba iti maysa a railway car iti Kamanilaan a nakatayan ken nakasugatan dagiti pinullo a kailiantayo, ken iti kaudian ti tallo a panagpabettak iti bomba iti Mindanao, dua a lawasen ti napalabas a nakatayan ti innem a tattao ken nakasugatan ti dua dosena iti North Cotabato.

Maitudtudo a ti terorista a grupo ti Jemaah Islamiyah ken ti Moro Islamic Liberation Front (MILF) ti nangisayangkat dagitoy a panagbomba.

Saantayo nga imurian ti gapuna kadagitoy a panagbomba. Adu dagiti makagapu. Ngem di malibak a pagtigtignayen ti ideolohia dagitoy a grupo ket uray kasano a panangikalinteganda iti tignayda, agdadata nga iwaywayatda ti kinadamsak, kinaranggas ken awan panangipateg iti biag, a rumbeng a saan nga aklonen, allawaten wenno arakupen ti asinoman a mangayat ken agtarigagay iti panagtalinaed ken panagari ti ayat ken kappia iti pagilian.

Sumagmamano a bulan ti napalabas, indeklara ti gobierno ti all-out war maikontra iti insurhensia. Itay nabiit, naipaulog ti Executive Order No. 546 a mamagbalin ti Philippine National Police a co-equal partner ti Armed Forces of the Philippines iti kampania maikontra iti insurhensia.

Sinaguday pay ti EO No. 546 ti pannakaited iti autoridad a mangaramat kadagiti lider ti barangay kas kanayonan a puersa tapno mapapigsa iti pannakirupak ti gobierno maikontra iti terorismo ken dadduma pay a pangta iti seguridad.

Inyunay-unay ti executive order ti pannakaipasdek dagiti barangay peace and order council (BPOC) ken iti panagbalin dagiti barangay tanod a kameng ti civilian volunteer organizations (CVO).

Iti daytoy a gundaway, adda iti umno a direksion ti gobierno iti naing-inget a kampaniana maikontra iti terorismo. Ta nabileg dagiti barangay a pangkontra iti kinadamsak ken kinaranggas.

Babaen ti BPOC, nasaysayud iti pannakikammayyet dagiti bumarangay iti polis ken iti militar ken dagiti sabsabali a lokal a komunidad para iti pannakirupak maikontra iti insurhensia wenno terorismo.

Iti sabali a bangir, masanay dagiti barangay tanod kas miembro ti CVO nga agbalin a kanayonan a puersa iti kampania maikontra kadagiti pangta ti seguridad.

Iti barangay level, ammo dagiti barangay officials dagiti kalugaranda agsipud ta inaldaw a kalangenlangenda ken kaadduanna nga agkakabagianda. Ammoda dagiti ganggannaet a sumrek iti lugarda. Kas kameng ti CVO, dagitoy ti nainget a siputan dagiti tanod. Itimbre met BPOC dagitoy iti polis ken militar no adda pakainaiganda iti grupo nga agisaysayangkat iti terorismo wenno iti insurhensia.

Agpangadua ti ganggannaet a mangiwayat iti dakes a panggepna no ammona a masipsiputan ti garawna.

Mamatikami a panawenen nga idauluan dagiti local government units ti tignay a mobilisasion dagiti barangay tapno tumulongda iti kampania ti gobierno maikontra iti terorismo. Dakkel ti maitulong dagiti barangay officials tapno malapdan ti pannakaiwayat iti kinaranggas ken kinadamsak a dagiti inosente nga umili ti kaadduanna a mabiktima.