Footer

Ita a Nobiembre, 3 a medical mission, maisayangkat iti I. Sur

VIGAN CITY – Iti bulan ti Nobiembre, agtudo a kasla grasia ti serbisio iti salun-at kadagiti agnaed ditoy probinsia.

Inwaragawag ni Bokal Jeremias “Jerry” Singson a tallo a medical mission ti maisayangkat ditoy probinsia kas paset ti programa ti gobierno probinsial a mangidanon iti serbisio ti salun-at kadagiti marigrigat a kaprobinsiaan.

Kinuna ni Singson a mangipaay dagiti doctor iti mata iti libre nga operasion iti cataract inton Nov. 17-18 a maangay iti Tagudin, Ilocos Sur.

Kinuna ti bokal a mangrugi a maangay ti check-up/screening dagiti maoperar iti mata iti Vigan ken Candon iti apagtapog daytoy a bulan idinto a makalawas sakbayna kadagiti residente iti Tagudin ken kabangibangna nga ili.

Segun ken ni Singson, sabali pay a mission ti maisayangkat inton Nov. 24-26 ket ditoy a maoperar dagiti umili a naduktalan iti check-up ken screening a maangay iti Gabriela Silang General Hospital inton Nov. 10-12 nga addaan iti bato iti kidney, bato iti gall bladder, loslos, sakit iti prostate ken dadduma pay nga addaan iti sakit iti naguneg.

Innayon ni Singson a maigiddan met kadagitoy nga aldaw ti dental mission a maipaay ti libre a konsultasion, pannakapag-ot ken libre nga agas ken kadagiti adda sakitna iti ngipen ken gugot.

Impalgak ti bokal a chairman ti komite ti salun-at a maisayangkat met ti Operation: Smile iti kaaldawan ti kasangay ni Bokal Ronald Singson inton Nov. 18 ket maopera ditoy a libre dagiti umili nga addaan gusing.

Naammuan nga addan nakaiskediul a 14 a pasiente a maopera ti gusingda. Agdagup iti 20 a pasiente nga adda gusingna ti mabalin a maopera iti daytoy a medical mission, segun iti bokal.

Kabayatanna, impatalged ni Singson a maaramatton ti CT scan kalpasan ti panagtraining dagiti tallo a teknisian ti Gabriela Silang General Hospital.

“Kabarbaro ti CT Scan ket kayattayo nga ammoda ti gargarawenda tapno saan a nadaras a madadael,” kinuna ni Singson.

Napaadda ti CT scan nga agpateg iti P30 milion babaen ti Philippine Charity Sweepstakes Office ken inisiatibo ni Gov. Luis “Chavit” Singson.

Comments are closed.