Footer

Multi-line showroom, umad-adu ti paglakuanna

SANTA, Ilocos Sur – Dumakdakkel ti paglakuan ti showroom ti Multi-Line Food Processing Plant manipud idi naluktan manen daytoy iti publiko babaen iti panangimaton ti National Tobacco Administration.

Daytoy ti naammuan kabayatan ti panakiuman-uman ti Tawid News Magasin ken DZTP ken ni Estrella de Peralta, Administrative Olfficer III ti NTA Candon, ken maysa kadagiti kangrunaan a mangkitkita kadagiti nadumaduma a produkto iti showroom ti nasao nga ahensia ken ti MLFP.

Kinuna ni de Peralta nga adda malaklakuan ti showroom ditoy a pakagatangan kadagiti nadumaduma a processed products ti planta manipud iti P10,000 agingga iti P15,000 iti inaldaw.

“Wen, addan average a  P10,000.00 agingga iti P15,000.00 iti inaldaw a paglakuanmi kadagiti walk-in buyers laeng, malaksid pay dagiti paglakuan dagiti taga-NTA,” kinuna ni de Peralta.

Maipalagip a naluktan manen ti showroom idi Hulio 28 iti daytoy a tawen nupay idi Oktubre 11 ti pormal a pannakalukat dagiti nadumaduma a planta.

Naammuan pay ken ni de Peralta a maysa kadagiti iplanplanoda ita ti pannakaawis dagiti nadumaduma a bus a dumagas iti showroom tapno gumatang dagiti pasahero kadagiti nadumaduma a produkto ti planta.

Mailaklako iti showroom dagiti produkto manipud iti planta kas iti hotdog, longganisa, BBQ, tosino, tapa, bagnet, presko a karne ti baboy, manok ken dadduma pay.

Comments are closed.