Footer

Ubing, nadungpar, natukkol ti imana

CAOAYAN, Ilocos Sur – Maysa nga ubing ti dinungpar ti motorsiklo a nakatukkolan ti akinkannigid nga imana iti pannakangilin ti Aldaw dagiti Sasanto.

Nabigbig ti ubing a ni Jonel Rapada, 7, idinto a nainaganan ti nangdungpar kenkuana a ni Martin dela Cruz, 39, naasawaan, residente ti Pandan ditoy.

Segun iti report, agdaldaliasat ti motorsiklo a minaneho ni dela Cruz idi kellaat a bimmallasiw ti biktima a puon ti nakadungparanna.

Mapapati a pinanggep ni dela Cruz nga arayaten ti biktima ngem naglibas idi makitana a darupen dagiti lumugar.

Naitaray ti biktima iti Gabriela Silang General Hospital ket nadait ti dunor iti kannigid a rupana ken nasemento ti akinkannigid nga imana.

Naammuan a malandokan ti ima ti biktima gapu ta natukkol.

Simmuko ti suspetsa a kinuyog ti maysa a polis iti kuerpo ti polis ditoy.

Comments are closed.