Footer

Naibati a plastic bag, nasuspetsa a naglaon iti bomba

VIGAN CITY – Panangtesting no nakaalerto ti kapolisan ditoy iti pangta ti terorismo wenno maysa laeng a panangsutil kadagiti tattao?

Iti sardam ti Oktubre 30, nakigtot dagiti empleado ti maysa a kompania ti transportasion ken dagiti traysikelan nga agur-uray iti pasaheroda gapu iti naidisso a plastic bag a mapapati a naglaon iti bomba iti asideg ti bangketa ti tiendaan publiko ditoy.

Naammuan iti maysa nga agpaspasada a dina kayat a painagan a nakitada ti maysa a Tamaraw FX a nagsardeng iti akin-amianan a paset ti kalsada iti ballasiw ti Partas Transportation, maysa a lalaki ti dimsaag sa mapapati nga inan-anatna nga indisso ti maysa a plastic bag iti asideg ti bangketa iti akinlaud a pasdek ti tiendaan publiko, dagus met laeng a limmugan ket sipapardasen ti lugan a pimmanaw.

Mapapati a XAW475 ti plate number ti nasao a lugan. Di met nabigbig dagiti naglugan iti Tamaraw FX.

Nagsuspetsa dagiti nakakita iti insidente a bomba ti linaon ti plastic bag ket maysa ti timmawag iti polis tapno sukimatenda.

Nagresponde dagiti polis ngem saanda a ginaraw ti plastic bag. Binantayanda ketdi ti lugar tapno awan ti umasideg idinto a nagpatulongda iti Provincial Police Office tapno mangibaon iti bomb squad a mangsukimat iti nasao a bag.

Idi simmangpet ti bomb squad nga indauluan ni Insp. Mendoza, kinordonda ti lugar ket awanen ti pinalubosanda a lugan a lumasat. Simmangpet met ti fire truck ti Bureau of Fire Prevention a nakasagana nga agdepdep no adda maparnuay nga uram.

Kalpasan ti naanat a panangsukimat ti bomb squad iti plastic bag, naduktalanda a naglaon daytoy kadagiti pappapel ken nagawangan a plastic container ken dua a depektibo a circuit breaker.

Madama ti panangtunton dagiti polis no asino dagiti naglugan iti Tamaraw FX a nangibati iti plastic bag.

Adda pammilin dagiti agtuturay ti PNP iti panagalerto ti kapolisan gapu iti manamnama a panagdadarison dagiti tattao kadagiti nadumaduma a kamposanto iti pagilian iti All Saint’s Day ken aldaw dagiti natay.

Comments are closed.