Footer

PNP regional director kadagiti polis: respetado, nadayaw nga imahe

VIGAN CITY – Kinuna ti kabarbaro a regional director ti Philippine National Police iti Rehion I a respetado ken nadayaw ti kayatna nga imahe ken karakter ti kapolisan iti babaenna tapno magun-odda ti suporta dagiti umili.

Kinuna ni PNP Regional Director ti Region I Police Chief Supt. Leopoldo Bataoil a kayatna nga apaman a makastrek ti maysa nga agkasapulan a tao iti uneg ti police station, masapul a maited kenkuana ti atension ken pannakaasikaso, saan a daytay di maitaltalek wenno mabugkawan pay.

“Napanglaw man wenno nabaknang, nakatsinelas wenno nakasando, nakakurbata, nakaamerikana wenno nakabarong, apagserrekna, masapul nga ited ti polis ti kangatuan a respeto ken panagdayawda,” kinuna ni Bataoil sana innayon a no pumanawen ti tao iti opisina ti polis, masapul a napagustuan iti serbisio a naited kenkuana.

Binisita itay Oktubre 31 ni Bataoil ti provincial police office iti Camp Elpidio Quirino, Bantay, Ilocos Sur sa nagturong iti Baluarte para iti panagkortesiana ken ni Gov. Luis “Chavit” Singson.

Ni Bataoil ti nangsukat ken ni Police Chief Supt. Alfredo de Vera, Jr. a nagretiro a PNP regional director idi Setiembre daytoy a tawen.

Sakbayna, nagpaay ni Bataoil a provincial director ti Pangasinan idi 2001, nagserbi a PROI chief, naiyakar iti Quezon City Police District kas deputy director sa nagpaay nga spokesman ti PNP ken hepe ti Northern Police District.

Inannugot ni Bataoil nga agkurkurang ti kapolisan, saan laeng nga iti armas no di pay sasakayan nga aramatenda iti pannakatagiben ti urnos ken talna ken pannakirupakda iti kriminalidad.

“I am aware of the needs of the police, not only in terms of arms but also in mobility,” kinuna ti regional director idinto nga inakona nga agkurkurang ti kapolisan iti motorsiklo, patrol car, patrol jeep agraman dagiti radio.

Ngem kinuna ni Bataoil a nupay adda programa ti PNP a mangipaay kadagiti kasapulan ti kapolisan, saan laeng koma nga agpampannuray lattan ditoy dagiti opisial iti field command no di mangiwayatda kadagiti wagas tapno masulnitan dagitoy a pagkuranganda.

Dinakamat ni Bataoil nga ehemplo ti Ilocos Sur a suportado dagiti local government units ken non-governmental organizations dagiti polis idinto nga inyunay-unayna a magun-od ti suporta ti komunidad iti peacekeeping efforts ti kapolisan babaen ti initiatibo dagiti field commanders kas iti chief of police ken provincial director.

“Ti tulbek ditoy, masapul nga umuna nga ideliberda ti kasayaatan a police service a kayat wenno kasapulan dagiti tattao,” kinuna ni Bataoil.

“No makita dagiti umili nga episiente dagiti polisda, nadaras ti panagrespondeda, narespetoda ken makatao… itedda ti suportada uray saan a kiddawen dagiti polis,” kinuna pay ti kabarbaro a regional director ti PNP.

Kinuna ni Bataoil nga awan pay ti planona a mangbalasa kadagiti opisial nga adda iti babaenna agsipud ta “kas kabarbaro a commander, itultuloyna nga iwayat ti ebaluasion ti nagapuanan dagiti amin nga adda iti babaenna ken adalenna ti estado ti tour duty term ti administrasionda.”

Comments are closed.