Footer

12 tattao, napetisionan a di makapagrehistro a botante

SAN ESTEBAN, Ilocos Sur – Saan nga inaprobaran ti Commission on Elections a makapagrehistro kas botante ti sangapulo ket dua a tattao kalpasan ti panangpetision ida ti maysa a partido ditoy.

Nainaganan dagiti saan a naaprobaran a botante ditoy da Ryan Barnachea, Rommel Cabatu, Rodrigo Joson, Dionisio Canaria, Fernando Cabatu, agpapada a residente iti Narvacan, Ilocos Sur; Kimberly D. Morales, Adolfo F. Morales, Ambrosia D. Morales, Mario S. Morales, Jr., Clarissa C. Morales, ken Mario F, Morales, mapapati a residente amin iti Malasiqui, Pangasinan; ken ni Elvin John Dacquel, agnaed iti Santa Maria, Ilocos Sur.

Iti interbio ken ni Vice Mayor Norman Mendoza, dinakamatna a ti Liberal Party nga idadauluan ni Mayor Armando Abad ti kangrunaan a nagpetision iti saan a pannakaipalubos ti panagrehistro dagiti nasao a tattao tapno agabalin a botante ditoy nga ili.

Kinunana a saan nga aggigian iti San Esteban dagiti taga-Narvacan no di  agkarkarpinteroda laeng  ket inaldawda nga agaw-awid.

Kasta met a saan nga aggigian iti daytoy nga ili dagiti ag-Morales a mapapati a kabagian ni Mildred Elaydo Morales.

Taga-Pangasinan a naikamang iti daytoy nga ili ni Elaydo ket kinabalubal ni Mendoza iti kinabise mayor iti eleksion idi 2004.

Naammuan pay a di met impapilit ti bangir a partido ti panangpetision kadakuada ti Liberal party.

Karaman dagiti 12 kadagiti agarup 292 a nagrehistro, immalis, ken nagpasukat iti naganda iti Comelec ditoy para iti maikatlo a kuarto iti daytoy a tawen.

Daytoy ti kaadduan a nagaplikar a botante iti Comelec iti daytoy nga ili.