Footer

Barangay kagawad, napang-or iti videoke bar

VIGAN CITY – Maysa a kagawad ti napang-or bayat ti panaginomna iti maysa a videoke bar a puon ti nakayospitalanna.

Naipan ni Marcelino Pilot, 41, naasawaan, kagawad iti Sagpat, Bantay, Ilocos Sur iti Gabriela Silang General Hospital tapno mataming ti sugatna kalpasan a pinang-or ni Bong Pugal, 21, residente ti Capangpangan ditoy.

Segun iti inbestigasion dagiti polis, agmaymaysa nga umin-inom ni Pilot iti Cely’s Videoke Bar iti agarup alas onse ti rabii ti Nob. 5 idi mapapati a makursonadaan ni Pugal  ket pinang-orna lattan ti biktima nga awan ti gapgapuna.

Inaresto dagiti nagresponde a polis ni Pugal ket dineteneda daytoy iti police station.

Inreklamo met ti akinkukua iti videoke bar ni Pugal gapu kadagiti nabuong a botelia ken di nabayadan nga ininom dagiti parokiano a timmakias gapu iti naparnuay a riribuk.

Sumagmamano nga aldaw sakbay ti insidente, maysa a lalaki ti inaresto dagiti polis gapu iti kaadda ti sabbikelna a paltog bayat ti panaginomna iti maysa a videoke bar ditoy.

Tiniliw dagiti polis ditoy ni Melvin Viaje, 27, residente iti Siwec, Sta. Catalina, Ilocos Sur gapu ta adda insabbikelna a 22 revolver magnum nga addaan iti lima a bala, bayat ti panaginumna iti Pers Videoke Bar a masarakan met laeng iti Jose Singson Street.

Kasla nagtubo nga uong dagiti karinderia nga adddaan iti videoke iti nadakamat a lugar.

Comments are closed.