Footer

Dadaulo ti militante a grupo, pinaglibakanna nga NPA

STA. LUCIA, Ilocos Sur – Kinuna ti maysa a mapapati a kameng ti New People’s Army a saan a pudno ti naipadamag iti radio a maysa a surenderee.

“Saannak nga NPA ken awan ti kinapudnona ti naipadpadamag a maysaak a surenderee,” imbatad ni Alex Tan mainaig iti naipadamag iti kallabes a simmuko iti kuerpo iti pulisia ditoy nga ili. 

Nupay kasta, inamin ni Tan, agindeg iti Conconig East, ditoy a maysa a dadaulo ti Solidarity of Peasants Against Exploitation (StopEx) ken agpaspasada iti traysikel.

Impetteng met ni Valentin Tan, ama ni Alex, barangay kagawad iti Pila East, Santa Lucia nga awan ti kinapudnona ti alegasion a kameng ti NPA  ti anakna.

Kinuna ni Valentin a kas maysa nga opisial iti barangay, isu ti umuna a manglapped iti anakna no talaga a timmipon iti NPA.

Segun iti ub-ubing a Tan, mangidatag kadagiti tattao a mangpaneknek ken manglawlawag a saan a kameng ti NPA agsipud ta naapektaran ti pamiliana iti nagwaras a damag.

Mainaig iti maipagarup nga isusukona, inlawlawag ni Tan nga idi Oktubre 24, inimbitaran ti hepe bayat ti checkpoint dagiti polis mainaig iti maipagarup nga operasion ti hueteng iti barangayda.  Kinunana a kaduana ti maysa a kagawad ti barangay a nagturong iti PNP station iti malem ti Oktubre 24 ngem saan a kas NPA surenderee.

Iti met biang ni PI Rolando Battulayan, kinunana a denggennanto pay ti palawag ni Alex Tan ken ti pamiliana sakbay a mangited iti reaksion ken komentona.