Footer

Death threat a naawat ti bokal, militar ti naggapuanna?

CANDON CITY – Ti militar ti itudtudo ti maysa a human rights lawyer ken bokal iti probinsia nga adda iti likudan ti naawatna a ballaag iti baet ti pananglibak ti maysa a nangato nga opisial dagiti soldado iti alegasionna.

Kinuna ni Bokal Robert Tudayan, presidente ti Philippine Councilors’ League, Ilocos Sur Chapter, a nakaawat iti nangisit a ribbon idi Oktubre 4 a patienna a maysa a ballaag iti biagna.

Innayon ni Tudayan, maysa a human rights lawyer, a suspetsana a ti militar ti naggapuan iti death threat gapu iti mapapati a panagab-abogadona kadagiti kameng ti New Peoples’ Army.

Ngem iti interbiona ken ni Jun Ramos iti DWRS, insungbat ti maysa nga opisial ti 50th IB ti Philippine Army a nakabase iti San Juan, Ilocos Sur nga awan ti pakainaigan ti militar iti naawat ti bokal a death threat.

Nupay inannugot ti opisial a ni Harold Cabreros, a nadakamat ti nagan ni Tudayan a mangab-abogado kadagiti kameng ti NPA bayat dagiti dialogo nga insayangkat ti militar kadagiti nadumaduma a barangay iti maikadua a distrito, kinunana nga awan ti pannakaammoda iti death threat a naawat ti abogado ken dagiti sumagmamano nga opisial ti barangay.

Kinuna ti bokal a sumagmamano pay nga opisial ti barangay, a pakairamanan ti barangay captain ti Tablac ti nakaawat met iti black ribbon.

Idi Oktubre 13, nagpukaw ni Barangay Captain ti Tablac Laureano “Berto” Galicia ket saanen a nagawid sipud pay dayta nga aldaw.

Awan pay ti tawag wenno pakaammona iti pamiliana no sadino ti ayanna.

Sakbay ti panagpukawna, iti interbiona iti radio, nadakamat ni Galicia nga adda naawatna a death threat.

Segun ken ni Tudayan, iti napalabas, mapapati a naikappeng dagiti nasao nga opisial ti barangay a nakaawat iti death threat iti militante a grupo kas iti Bayan Muna ken Anak-Pawis.

Mainaig iti alegasion ti militar a mangab-abogado kadagiti kameng ti NPA, kinuna ni Tudayan a kas abogado, awatenna amin nga umasideg kenkuana para iti serbisiona kas sinapataanna a pagrebbenganna.

“Saanko a salsaludsoden kadagiti agpatulong kaniak no NPAda wenno saan,” kinuna ni Tudayan.

Ngem kinuna ni Cabreros nga adda panagduaduada iti loyalidad ni Tudayan gapu iti kapaliiwanda a panangsalsalaknibna kadagiti kabusor ti turay.

Kabayatanna, iti panagpanawagan ni Oropesa Galicia-Golar, anak ni Kapitan Galicia, impakaasina kadagiti kailianna ti panangipakaammoda kadakuada ania man nga impormasion para iti pannakatunton ti amada.

“Uray bangkayna laengen, basta makitami ni tatangmi!” kinunana.