Footer

OFWs a napadisi iti gubat iti Gulpo, umawatda iti war claim

TAGUDIN, Ilocos Sur – Naimbag a damag kadagiti overseas Filipino workers a naawanan iti trabahoda gapu iti gubat iti Gulpo: dakkel ti posibilidadna a maalada met laengen ti nabayagen a naipila a claimsda.

Impakaammo ni Mayor Roque “Jun” Verzosa, trouble shooter ti Ilocos Sur Hotline, bayat ti panagreportna iti nasao a programa itay Nob. 4 nga adda additional a naaprobaran para kadagiti OFWs nga adda claimsda gapu iti pannakapadisida iti trabahoda maigapu iti gubat iti Gulpo.

Idi 1991, rinaut ti Iraq ti Kuwait ket rinibu nga OFWs ti nagbakuit gapu iti gubat iti Gulpo.

Segun iti mayor, aganay laeng a 15,000 kadagiti OFWs a nasakaw ti gubat iti Gulpo ti nakaala iti claimda idinto a 40,000 ti nagipila iti claims.

“Ngarud, adda pay 25,000 a saan a naka-claim,” kinuna ni Verzosa idinto nga innayonna a “baka adu pay la a kailiantayo ti saan pay a naka-claim.”

Kinuna ni Verzosa, bayat ti pannakipatpatang kenkuana da Chato Alda ken Eugene Paet, anchor ti Ilocos Sur Hotline, nga adda impila ti Overseas Workers Welfare Administration (OWWA) a nagnagan dagiti OFWs a saan pay a naka-claim base kadagiti rekorda bayat iti Gulf War ket no adda ti naganda iti nasao a listaan, maalada ti claimda.

Nupay kasta, inlawlawag ti mayor a dagiti laeng OFWs a nagipila iti claim ti maikkan iti tsansa a makaala iti $4,000 a supapakda kas biktima iti gubat iti Gulpo.

Kinuna ni Verzosa a saanen a mabalin dagiti OFWs a nasakaw ti gubat iti Gulpo ti agipila iti claim ta naserraanen daytoy.

Indagadag ni Verzosa kadagiti OFWs a biktima ti gubat iti Gulpo nga adda naipilan a claimda ti mangisubmite ti naganda, passport ken dokumento a pakakitaan a nasakawda iti Gulf War iti Ilocos Sur Hotline iti Vigan wenno iti Tagudin, Ilocos Sur tapno mairamanda iti umuna a grupo a maidatag iti OWWA tapno mapatalgedan no karaman ti naganda kadagiti naaprobaran nga umawat iti war claim.

Maipalagip a ti Ilocos Sur Hotline ti nangiyussuat iti panag-claim dagiti OFWs a naapektaran iti Gulf War.

Comments are closed.