Footer

Problema ti sangalubongan

Iti pannakaduktal kadagiti baro a teknolohia, isangbayna dagiti benepisio ken panagdur-as iti biag. Idi, no agudong dagiti agnaed iti away, agluganda iti karison wenno kalesa. Itan, malaksid iti traysikel, addaytan dagiti dyip, bus, kotse, tren ken eroplano no agbiaheda.

Idi, makaanayen ti puyupoy, paypay ken nalamiis a danum iti karamba a mangpabang-ar iti tao lalo no kasdiay a kagapgapuna iti kataltalonan wenno iti trabaho. Itan, no kayatna ti agpalamiis, luktanna laeng ti bentilador, aircon, ti refrigerator para iti nalamiis nga inumen, wenno agpasiar kadagiti mall tapno masalibukagan ti riknana.

Ngem iti sanguanan dagitoy a pagnam-ayan dagiti tattao, idatengna met dagiti pagdaksan, kas iti panagbalbaliw iti aglawlaw.

Gapu iti karbon nga ibel-a dagiti paktoria, sasakayan ken dagiti nadumaduma nga alikamen a mangmangted iti pagnam-ayan kadagiti agnaed daytoy a lubong, naparnuay ti polusion iti tangatang.

Wen, nakaron ti polusion ket nadarnapanen iti karbon ti tangatang a mangkubkubong iti pudot manipud iti init a pakaigapuan iti panagpudot ti aglawlaw.

Sagsagrapentayon ti epekto ti panagpudot ti lubong. Mangdakamattayo iti sumagmamano:

  • Mangrugin a marunaw dagiti natangken a yelo iti North ken South Pole. No agtultuloy daytoy, ngumato ti level dagiti baybay nga agtungpal iti pannakalayus dagiti nababa a pagilian. Nakaam-amak ti senario iti masakbayan: siudad ken il-ili nga alun-onen ti ngimmato a kabaybayan.
  • Agbaliwbaliw ti paniempo ket paltuadenna ti nakaro a panagtutudo wenno igaaw. Mainayon ditoy ti pannakaparnuay dagiti narungrungsot a bagyo, allawig ken dadduma pay a weather phenomena.
  • Itatanor dagiti sakit iti bara, kudil ken dadduma pay nga an-annayen gapu iti narugit a gas iti angin a nangpayong iti tangatang. Iti daytoy a senario dumagsen ti ibaklay dagiti gobierno iti sangalubongan iti benneg ti salun-at.

Ket itay la nabiit, rimmuar ti report a mangbalballaag dagiti gobierno iti lubong a no dida italtalek daytoy kumarkaro a problema ti polusion, dumteng ti tiempo nga agbalin a refugee dagiti 200 milion a tattao iti lubong gapu iti tikag wenno layus a patauden ti di malapdan a panagbaliwbaliw ti paniempo.

Dakkel ti akem ti gobiernotayo, kas kadagiti sabsabali pay a gobierno, iti panangkontrol iti ikakaro iti polusion. Maysa ditoy ti nainget a panangipatungpal kadagiti paglintegan iti pagilian, kas iti Clean Air Act ken dagiti programa a panangpaberde iti aglawlaw.  Ngem makaanay kadi dagita?

Makunami: agtultuloy latta daytoy a problema no saan nga agkakammayyet amin a gobierno iti lubong. Kasapulan ti kooperasion ti tunggal pagilian a mangsaluad iti Ina a Lubong.

Ta maymaysa ti lubong. Ti problema ti polusion, problema ti sangalubongan. Ti sakit ti lubong, sakit amin nga agindeg, nabaknang man wenno napanglaw, literado man wenno di nakaadal, ubing man wenno nataengan.

Saantayo koma nga itulok lattan ti pannakaungawna gapu iti panagbaybay-a ken panagabusotayo iti aglawlaw. Agkutitayo itan ta di pay naladaw. ##

Comments are closed.