Footer

Ti ladawan iti malem

(Umis-isem ti langit iti nalaus a ragsak
Nangibisibis iti arbis a makabiag;

Daniw ni Danilo C. Caburian
Brgy. Balawarte, Agoo, La Union

(Umis-isem ti langit iti nalaus a ragsak
Nangibisibis iti arbis a makabiag;
Iti rukib-kaunggan nakaparsuaan
Mabang-aran dagiti tumatayab.)
Dinto magebgeban ti gil-ayab
A mamagrettab mulmulmolan ta barukong
Umamonto dagiti paappupo nga alimukeng
Ta adda bileg dagiti tarigagay.
Dagiti agek, arakup kinatalingenngen.
Riknaen ti maibulos a puyupoy
Adda samay ti nabileg nga agsapa.
Dagiti pumaypayapay a ladawan
Mamagkulding kutibeng kinabirhen
Pusuak, sarraisi ti kristal a danum
Agaludaid nga agturong iti rangkis.
No kaano nga aggibus ti daniw awan makaibaga
Iti tan-ok ni ragsak a silud ti Namarsua
Iti gingget bantay a taeng ti kararua
Bugas darepdep ti nadaeg a namnama
Kinasin-aw ladawan dagiti sampaga!
Ti anniniwan no agpakadan ti malem
Madigos ti rimat kinalibnos pakabuklan;
Adda sadiay ti pudno nga alintatao
Diro a pagimbagan, salluad masakbayan!