Footer

Katedral ti Vigan, naipatakder idi 1641 wenno 1790? (Maikatlo a paset)

IYULOGTAYO iti Iluko ti paset ti resolusion in Konsehal Everin Molina nga inadawna met manipud iti sinurat ni Fr. Frederick Scharpf:

“… Tapno makumpirmaran ti imbatad ti bishop (Garcia), nangaramid iti dokumentasion ti sibil a gobierno babaen ti tulong dagiti residente nga Espaniol ken dagiti Indios a nangsukimat iti daan a simbaan ken nangireport iti kondision ti pundasion, diding, bobeda ken iti kadakkel ti simbaan mainaig iti dumakdakkel a populasion ken no maiballakad ti pannakatarimaanna wenno maipatakder iti kumpleto a baro a pasdek.

“…iti okular nga inspeksion nga insayangkat da Don Juan Joseph de Iriarte manipud iti Tolosa iti Vizcaya (Espania), Don Francisco Moreno manipud iti San Lucas de Marramea iti Andalusia (Espania) ken Don Francisco Sespedes manipud Mexico ken Don Domingo de los Santso, pangulo ti maysa a barangay iti Vigan, indeklarada  a saan a nasayaat ti arkitektura ti sibubukel a pasdek; saan a nasayaat ti lugar ti simbaan agsipud ta masarakan iti nababa a sitio a malaylayus no tiempo ti panagtutudo, ket dumanon pay ti danum iti kangrunaan nga altar ken iti sakristia; asideg ti pasdek iti agiwes a karayan a nangparuka iti daga iti asideg ti pundasion ti simbaan kabayatan ti panagtutudo; no adda mapasamak a ginggined iti uneg ti sumagmamano a tawen, rebbaanenna ti sibubukel a pasdek; saan nga atiddog wenno nalawa ti simbaan para iti dumakdakkel a populasion ket ti resultana adu a tattao ti saan a  nakimisa wenno awan ti itiitan iti simbaan, a saan la ketdi a maitutop para iti pammati; nakapsuten dagiti diding, nupay kasla nalagdada pay; nadadael ti sementerio ket kagudua laeng ti nalakub; addaan ti torre a yan dagiti kampana iti uppat laeng a poste a mangsuporta kadagiti dadduma a pasanggir a nakaigalutan dagiti kampana; naanayen dagiti pasanggir a mangsuporta iti atep (palamenta) ti simbaan, ket agpeggad nga agtupaken ti sibubukel a bubong, naipatakder ti simbaan para laeng iti maysa nga ili ket dina inar-arapaap nga agbalin a siudad ken bassit unay a para iti katedral ti tugaw nga episkopal, wenno saan a disente ti kitana; saan a mairemedio babaen ti aniaman a pannakatarimaanna no di  nagasgastos pay.”

Naipatulod ti surat ni Bishop Miguel Garcia agraman ti kakuyogna a dokumentasion iti Espania. Nasayaat ti pannakaawatna ken inabuloyan ti Espania dagiti merito ti kaso ken intedna ti pammalubos ken tulong para iti pannakaipatakder ti simbaan. Ngem adda sumagmamano a kondision: masaspul a naannad a mapili ti lugar a pakaisaadan ti kabarbaro a katedral babaen ti kooperasion ti sibil a gobierno.

Adawentayo manen ti resolusion nga indatag ni Molina:

“… idi sublatan ni Bishop Juan Ruiz de San Agustin, ORSA, ni Bishop Garcia ket ikutanna ti see ti Vigan idi Mayo 15, 1782, naduktalanna nga awan ti pagtaengan ti obispo wenno disente a katedral ket immuna nga inaramidna ti pannakabangon ti palasio ket kalpasanna idi 1785, idi bisitaen ni Don Jose Basco y Vargas a Capitan General ken Vice Patron ti Vigan, personal nga inaramat ti obispo ti gundaway a  nangipakita iti daan a simbaan tapno maguyugoyna daytoy iti kasapulan a baro a pasdek.”

Insurat met ni Fr. Scharpf: “Idi napan ti obispo (Ruiz) iti Manila iti nasapa a 1786 para iti ordinasionna, induronna ti proyekto ket nagun-odna ken ni Basco ti pammalubos a mangirugi iti pasdek ken panangitultuloyna nga awan sardayna.  Idi makasubli iti Vigan, nangruna a nakakumikomanna ti panangpatan-ayna kadagiti kasapulan a material a dina pakaringgoran unay dagiti dokumento manipud Manila a nabuntog ti isasangpetna. Nagtalek iti tulong ti Dios.”

Kastoy ti panangdeskribir ti obispo iti mapatakder a simbaan: Adda iti tallo a naves: at-atiddog bassit ngem 97 “varas” (ca .81 m.); aglawa iti nalablabes bassit ngem 35 varas (ca. 29 m.) ken agtayag iti 18 varas (ca. 15 m.).

Nailugar ti panuli ti simbaan idi Enero 31, 1790. Kalpasan ti uppat a tawen, nalpas ti diding, bato amin.

(Maigibusto)