Footer

Kinapanglaw, di lapped iti panagballigi

Naminsan pay a napaneknekan a saan a lapped ti kinamarigrigat ken kaawan adal iti panagballigi ti maysa a tao.

Itay Nob. 12, naragpat ni Ronato “Ronnie” Alcano ti balligi ken prestihio kalpasan nga inyalatna ti kampeonato iti 2006 World Pool Championship a naangay iti Philippine International Convention Center iti Pasay City.

Imbalat ni Alcano ni German cue champion Ralf Souquet iti finals ti torneo ti billiards babaen ti score a 17-11ket inyawidna ti tropeo ken premio a $100,000 (aganay a P5 milion).

Impresibo ti rekord ni Alcano iti daytoy a torneo. Inabakna ni Efren “Bata” Reyes, paborito dagiti Pinoy a mangabak iti torneo; ni Kuo Po-Cheng ken Wu Chia Ching, dua a malalaki a billiard players, sa ni Souquet iti finals.

“Nasaysayaatton ti biag para kaniak, sigurado, saan a kas idi a didak pay am-ammo,” kinuna ni Alcano.

Iti maysa a nagraduar laeng iti elementaria, dakkel ti kaipapanan ken ni Alcano iti panangabakna iti torneo ti biliar a nakipagpartisiparan dagiti kalaingan a billiard players manipud iti 42 a pagilian.

Dimmakkel ni Alcano, maikatlo iti lima nga agkakabsat iti lugar dagiti marigrigat. Maymaysa ti kuarto ti pagtaenganda, ket malaksid iti daan a telebision ken bentilador, awanen ti sabali pay nga appliances. Di napalitada ti hollow blocks a diding ti balayda a timmakder iti dida kukua a lote.

Nasapa a nasursuro ni Alcano ti ay-ayam a biliar iti pagbiliaran ti nagawan nga amana a dati a basketbolista. Ditoy ti nakaasaan ti abilidad ni Alcano iti biliar.

Ngem uray nakita ti amana ti siglatna, kayat daytoy nga agadal, saan ketdi nga iti biliaran ti ayuyangna.

Idi agtawen iti 12, naisangolen ni Alcano kadagiti ay-ayam a dadakkel ti pusta a kaadduanna ti nangab-abakanna.

Maibilang a naglasat ni Alcano iti abut ti dagum iti panangpadasna iti dayaw ken pannakabigbig iti tay-ak ti billiard.

Isu ti kutit iti 64 nga umaayam a simrek iti pinal a listaan dagiti makisalip iti torneo.

Iti elimination round, nanabtuog iti immuna a dua a labanna. Tapno lumsot iti sumaruno a round, kasapulan a tambakanna ni Marcel Marthens a kasalipna iti innem a rack. Nagun-odna dayta babaen ti 8-2 a panangabak.

Ni Alcano ti maikatlo a Filipino a nangabak iti World Pool. Immuna ni Efren “Bata” Reyes (1999) iti Cardiff, Wales, sa ni Alex Pagulayan idi 2004 idi 2004 iti Kaohsiung, Taiwan.

Idi 2002, napili nga A2 Billiards Rookie of the Year gapu iti panangabakna iti lima a torneo ken $33,000 a gunggona iti Joss NE Tour US.

Alaentayo ti balikas ni Souquet, ti losing finalist: “Talaga a maitutop kenkuana ti titulo… inabakna ni Reyes, Wu Chia-Ching ken Kuo-Po-Cheng.”

Awanen ti nasaysayaat pay a balikas a pangbigbig iti kabaelan ni Alcano a kas ken ni Efren “Bata” Reyes, pannakakatrena ti billiards table kadagiti panawen a karigat ti panagbiagna.