Footer

Ti Lingayen Gulf, ti kanaskanas ken ti saibbek

Uray gaburanka iti lua awanen mangipangag
Ta adda ngata pay konsensia dagiti antukab?

Daniw ni Cristina T. Laxamana
Sta. Rita, Agoo, La Union

Uray gaburanka iti lua awanen mangipangag
Ta adda ngata pay konsensia dagiti antukab?
Nabilbileg gayam itan ti pirak
Mabusalan ti ngiwat adut’ agbalin a bulag!
Ta asinot agtagikua kadagiti trawl ken buliboli?
Da apo doktor, abogado ken uray ni gobernador!
Uray dagiti babassit a mangngalap
Bayyating ken dinamitan ‘ti inda metten ibarsak!
Inyikkisko payen sagsagabaem a sugat
Ngem tulengda, didak man la impangag.
Ta uray ipustak ngatan kakaisuna a biag
Dikan masalluadan a puon anges masakbayak.
Isu nga aramidemon: gaburam ti aplaya
Tapno agkintayegda itdem a didigra?

Comments are closed.