Footer

Guns for hire, nakasuan pannakapapatay ti bokal ti Abra

BANGUED, Abra – Masuspetsa a natangdanan dagiti nangpatay ken ni Provincial Board Member James Bersamin ket sirsirigen ti polis no adda pakainaigan ti krimen iti krusada ti bokal maikontra iti droga.

“Kontra droga ti krusadana (Bersamin) ket mabalin a drug lords ti nangibilin iti pannakapapatayna,” kinuna ni Senior Supt. Rogelio Damaso.

Agdama a suksukimaten dagiti inbestigador dagiti indatag ni Bersamin nga ordinansa iti panagbirokda iti clue a makaited lawag iti panagtambang.

Kinuna ni Damaso a kitkitaenda dagiti sabali pay nga anggulo ngem di mamati a politika ti motibo ti pannakapapatay ti bokal.

Kasta met a kinuna dagiti kabagian ti natay a saan a politika ti rason ti pannakatambangna agsipud ta awan ti ammoda a kabusor daytoy.

Kinuna ni Josefina, asawa ti bokal, nga awan plano ti asawana nga agkandidato para mayor iti Bangued, kas immun-una a naireport kadagiti pagiwarnak.

Innayon ti balo a plano ketdi koma ti asawana ti agtaray a konsehal iti Bangued.

Kanaig daytoy, naipilan ti kaso maikontra kada Misael Gatoc, 39, ken Julie Aldaca, 22, mapapati a guns for hire, iti prosecutors’ office ditoy.

Intudo ti maysa a saksi da Gatoc ken Aldaca a nangpaltog ken ni Bersamin bayat ti panagdiagingna iti plasa ti ili iti agsapa ti Nob. 11.

Dagus nga impatay ni Bersamin dagiti innem a sugatna.

Daytoy ti maikadua a gundaway a napapatay ti maysa nga opisial ditoy probinsia.

Idi Enero 13 daytoy a tawen, napapatay ni Mayor ti La Paz Marc Ysrael Bernos iti plasa ti ili.