Footer

Kapitan ti barangay, nagudas iti ambos

STA. CRUZ, Ilocos Sur – Maysa a kapitan ti barangay ti napapatay bayat ti panagdaliasatna iti Barangay Lantag ditoy itay lawasna.

Nagsagrap kadagiti sugat iti nadumaduma a paset ti bagina a dagus a nakatayanna ni Barangay Captain Robert Abaya, 43, naasawaan, mannalon, ken residente ti Barangay Camanggaan ditoy.

Nasugatan met iti stray bullet ni Antonio Fabro, Jr. 32, mannalon, residente iti Barangay Lantag ket naitaray tapno maagasan dagiti sugatna iti Sta. Lucia District sa naiyalis iti Tagudin District Hospital.

Naammuan ti DZTP ken Tawid News nga iti alas dos iti malem idi Nobiemre 13, kagapgapu ti dyip a nagluganan ti kapitan ti barangay iti Barangay Cabaroan, ket agdaldaliasat iti nagkurbaan ti Barangay Lantag idi parakpaken ti dua a lalaki a nakasakay iti motorsiklo.

Nagudas a dagus ti biktima a nakatugaw iti likud ti lugan. Saan a naan-ano ti drayber ti dyipni, ni Remigio Pascua, 57, naasawaan, residente ti Barangay San Jose ditoy met laeng nga ili agraman ti dua a sabali pay a nakalugan.

Nakasarak dagiti inbestigador iti 28 a kapsula manipud iti M-16 ken cal. 45 iti nakapasamakan ti krimen.

Di pay ammo no ania ti motibo ti pammapatay ken kinaasino dagiti nangisayangkat iti krimen.

Itay napan a bulan, uppat nga agtuturay a pakairamanan ti maysa a human rights lawyer ken bokal iti probinsia, ken 3 a barangay captain a mapapati a naikappeng iti kallabes iti militante a grupo ti nakaawat iti ballaag iti biagda.

Idi Oktubre 13, nagpukaw ni Brgy. Captain ti Tablac, Candon City, Laureano Galicia ket agingga ita di pay simmangpet.

Alegasion ni Bokal Robert Tudayan, maysa kadagiti nakaawat iti black ribbon, a ti militar ti naggapuan ti death threat agsipud ta mapapati a dinakdakamatda ti naganna a mangab-abogado kadagiti kameng ti New Peoples’ Army.

“Kas abogado, itedko ti serbisiok a diak salsaludsoden ti kinaasino dagiti umasideg kaniak, ta dayta ti sinapataak a pagrebbengan,” kinuna ni Tudayan.

Ngem insungbat ni Col. Harold Cabreros, commanding officer ti 50th IB a nakabase iti Guimod Norte, San Juan, Ilocos Sur nga awan ti pannaka-ammoda iti naawat da Tudayan a death threat.