Footer

Militante a grupo kinondenarda pannakapaltog lider ti Bayan Muna

VIGAN CITY – Kinondenar dagiti militante a grupo ken opisial ti simbaan ti pannakapanggep ditoy iti biag ti maysa a pastor.

Kinondenar ti Ilocos Human Rights Advocates (IHRA)-Karapatan ti pannakatambang ni Rev. Billy Austin, 39, naasawaan, pastor ti United Church of Christ in the Philippines (UCCP), dadaulo ti Bayan Ilocos idinto a pinabasolna ti death squad ti militar a mapapati nga adda pannakainaigna iti pammaltog.

Kinuna ni Rod Tajon, sekretario heneral ti IHRA, ti grupo a nangimbita ken ni Austin iti seminar nga inangayda ditoy, nga adda tattao a nangsursurot ken ni Austin a nakalugan iti motorsiklo iti Laoag City makalawas sakbay ti pannakapaltogna.

Kabayatanna, kinuna ni Sister Alice Sobreviñar, iti Association of Women Religious in Baguio and Benguet a “nakaam-amak ti mapaspasamak iti pagiliantayo ta dagiti tattao a kayatna ti agtrabaho a mangsalaknib iti kalintegan dagiti sabsabali a tattao ket maatake ken mapapatay.”

Ngem pinaglibakan ti maysa nga opisial ti militar nga adda pannakaibiangda iti pannakagandat iti biag ni Austin.

Kinuna ni Col. Harold Cabreros, commanding officer ti 50th IB Philippine Army a nakabase iti Guimod Norte, San Juan, Ilocos Sur nga awan ti ammoda iti napasamak ni Austin.

Kinumpirmaran ni Austin bayat ti pannakiuman kenkuana ti media iti nakaitarayanna nga ospital ti pannakasipsiputna manipud idi nadutokan a chair ti Bayan Muna Ilocos.

“Iti amin nga anggulo a pampanunotek, awan met ti personal a ka-grudgeko,” kinuna ni Austria, sana innayon a ti pannakadutokna a dadaulo ti Bayan Muna Ilocos ti patienna a gapu iti pannakasursurotna uray iti Laoag City.

“Uray pay idi Hulio ita a tawen, adun dagiti agbanatbanat kaniak idiay Ilocos Norte ken Laoag City,” kinuna ni Austin idinto nga impalgakna nga iti maysa a seminar nga inatenderanna, sinurot ti maysa a Toyota FX.

Kagapgapuda iti seminar, magmagna da Austin ken uppat pay a kakaduana, da Avelino Dacanay, 45, taga-Aringay, La Union; Marcelino Mariano, 34, pastor ti Poblacion, Alilem; Lorenzo Amale, 37, pastor iti San Ramon, Sigay ken Lenvin Salvador, iti Del Pilar Street, Barangay 3 ditoy iti agarup alas 9:30 ti rabii ti Nob. 9, nga agturong iti opisinada idi paltogan dagiti suspetsa a nakalugan iti motorsiklo.

Napuntaan ti dua a luppo ni Austin ngem nabaelanna nga inkamang ti bagina iti opisinada. Nagtaray met dagiti kakaduana a nagreport iti polis.

“Nasipnget a partena (Del Pilar) ti nangsabatanda (suspetsa) kadakami… nakitak diay paltog a nakapaturong, isu a nakapagpaigidak bassit… isu a saanak a napuruan,” kinuna ti pastor.

Nakarekobre dagiti polis iti lima a kapsula a nagtaud iti cal. 45 iti nakapasamakan ti pammaltog. Di pay ammo ti kinasiasino dagiti nanggandat iti biag ni Austin.

Comments are closed.