Footer

Retirado a maestra, natakawan iti selpon

VIGAN CITY – Nadukotan ti maysa a retirado a maestra bayat ti panaggatangna iti uneg ti pagtagilakuan iti libro ditoy.

Nagpulong iti polis ni Nove Morillo, 59, naasawaan, residente iti Barangay Nagsangalan, a nadukot ti selponna bayat ti panagshoppingna iti National Book Store.

Segun iti biktima, bayat ti kaaddana iti nasao a pagtagilakuan, nadlawna ti dua a babbai nga immasideg kenkuana ngem dina intaltalek dagitoy gapu iti pammatina a kustomerda a kas kenkuana.

Idi agbayad ni Morillo, natakuatanna laengen a naluktan ti bagna ket awanen ti selponna nga agpateg iti P16,000.

Addan sumagmamano a mannipdut a natiliwan ditoy siudad iti kallabes ngem saanda a nakasuan gapu ta nagpukawen ti interes dagiti nabiktima a mangidarum kadakuada kalpasan a naisubli ti natakaw a gamengda.

Comments are closed.