Footer

3 selpon, kuarta, natakaw iti pagadalan

SANTA LUCIA, Ilocos Sur – Tallo a selpon ken dadduma pay a napapateg a bambanag ti tinakaw dagiti mannibrong iti maysa a pagadalan ditoy itay nabiit.

Nagreport iti polis ni Albert Hermosora, 20, utility man, a natakawan ti Sta. Lucia Academy, ket kinasakasda ti tallo a selpon a pakairamanan ti V600i Sony Ericson, Nokia 3210, ken maysa pay a di nainaganan ti brandna a selpon, di masisinuo a gatad ti kuarta, ken maysa a portable CD player.

Segun ken ni Hermosora, naduktalanna laengen ti panagtakaw idi sumrek  iti pagadalan ket nakitana a naluktan ti opisina ti prinsipal ken ti tesorera.

Naammuan iti inbestigasion dagiti polis a dinadael dagiti di pay nabigbig a mannanakaw ti padlock ti ridaw dagiti nasao nga opisina, ken pinerdida dagiti jalousy ti opisina ti prinsipal ket ditoy ti nangkasakasanda kadagiti selpon, kuarta ken portable CD player.

Mapapati a temporario a naidulin dagiti selpon a nakumpiska manipud kadagiti estudiante iti opisina ti prinsipal.