Footer

Adda kasukat ti maited

AIM HIGH, fly high! Wen, no agarapaapkan, daytay nangato. Daytay kangangatuan iti amin. Daytay kapkapnekam. Kakaisuna a libre, saan a magatang ti agarapaap. Daytoy ti kakaisuna a gameng iti rabaw ti daga a nakapatpateg la unay ngem libre. Isu a no agarapaapka, daytay makapnek. Dayta nga arapaap ti target wenno medida iti  tuntun-oyem iti biag.

Adda panggep no apay a nasken nga agbiagka, no apay a nasken nga aramidem dayta a banag. Kayatmo a gun-oden dayta nga arapaap, ‘su a nasken ti panagpursigi. Try and try until you succeed.

Ngem kasanon no dika agballigi? Kasanon no kabaliktad ti inarapaapmo ti dimteng kenka? Ania ti aramidem? Ania ti reaksionmo? Agpulkok? Agliday? Masuron? Gumura?

Adda  katukadna amin a banag ditoy rabaw ti daga. No saan a dimteng ti namnamaen, adda sabali a dumteng a kasukatna. Ta saan  a matungpal amin a kayat iti sirok ti init. Adda met dagiti pannakapaay. Saan a mapasamak amin iti namnamaen a mapasamak.

Adda kayatko nga istoriaen. Pakasaritaan ti dua nga anghel nga immulog ditoy daga. Nanglimlimoda a  baket ken ubing, nga awanan iti pagnaedan.

Inkeddengda ti sumangbay iti balay ti kabaknangan amin nga agnanaed iti bakras ti bantay.  Adu ti daga ken negosiona. Mansion ti balayna.

Impambar dagitoy dua nga anghel kadagitoy nabaknang nga agassawa a nasipngeten  ket awan ti maturoganda.  Nagpakpakaasida  mapalubosanda a sumangbay ken maturog.

Ngem saan nga iti uneg ti mansion ti naited a pagturogan dagiti dua nga anghel no di iti suli ti bodega a dumna kadagiti rukrukib ti bantay. Dagiti sobra dagiti nabaknang ti insupotda a kanen dagitoy.

Tumengngan ti rabii idi mariingan ti ubing nga adda pakakumikoman ti baket nga anghel.

“Sinerraak laeng ti bassit nga abut ti bakrang daytoy a bantay. Nasken a maserraan. Pagsayaatanta daytoy nga aramidek,” kinuna ti baket nga anghel.

Saan metten a nagtimek ti ubing nga anghel.

 Kabigatanna, nagpakadan dagiti dua nga anghel kadagiti nabaknang. Simmaruno a napananda ti balay ti nanumo a mannalon iti away.   Kalapaw ti pagindegan dagitoy.

Kiniddaw dagitoy nga anghel a sumangbayda koma ta naamitanda ti rabii iti dalan.

Siraragsak dagiti agassawa a mannalon a nangpasabay kadagiti dua. Nakilanglangda a nangan. No ania ti kanen dagiti mannalon isu met laeng kadakuada. Naited kadakuada ti siled dagiti agassawa a pagturoganda. Napaliiw ti ubing nga anghel a nupay masaksakit ti asawa a babai, siraragsak latta a nangpasangbay kadakuada.

Kabigatanna, nariingan ti ubing nga anghel a naliday unay dagiti agassawa. Ngamin, natay ti kakaisuna a nuangda a dakkel a katulonganda iti talon.

Sinita ti ubing nga anghel ti baket nga anghel.

“Tinulongam dagiti nabaknang ta sinerraam ti abut ti tunnel a pakaisagmakanda idinto a dimo man la naikanawa ti pannakatay ti nuang dagitoy a marigrigat!” kinuna ti ubing nga anghel.

“Kasta ngamin ti tao. Adda daydiay pasamak a dumteng koma iti biagda ngem saan a rumbeng a mapasamak kadakuada,” insungbat ti baket nga anghel.

Nagrupanget ti ubing nga anghel. Dina masirok ti kayat a sawen ti baket nga anghel.

“Daydiay tunnel iti bodega dagiti baknang, adda nakitak a naidulin a bulto dagiti binarreta a balitok. Adda pay golden Buddha ken nakalakasa nga al-alahas ken sensilio a balitok. Saan a rumbeng a matagikuada dagidiay a kinabaknang, lalo laeng a saanda nga ammo ti padada a tao no bumakbaknangda pay.”

“Apay ngarud  nga intulokmo ti ipapatay ti nuangda?” sinaludsod ti ubing nga anghel.

“Immay ni Patay idi rabii. Alaenna koman ti masaksakit a babai, ngem ti nuang ti pinalubosak nga alaenna. Iti kinadakkel ti puso dagiti agassawa, kasapulan ida iti pannakairakurak ti kinaimbag ditoy rabaw ti daga,” kinuna ti baket nga anghel.

Iti panagawid dagiti dua nga anghel, imbatianda dagiti agassawa a mannalon iti igatangda iti hand tractor ken pagpaagas ti masakit nga asawa a babai tapno pumaut pay ti panagbiagna.

No maminsan, agkiddawtayo iti grasia iti Namarsua. Ngem saan a dumteng kadatayo ti kiniddawtayo. Ngamin, nakita ti Namarsua nga adda nangnangruna a kasapulantayo nga isu ti intedna. Ngem saantayo nga ammo nga adda kasukat ti namnamaentayo a dumteng.

No dadduma, gamgamentayo dagiti material a banag. Kayattayo a tagikuaen amin a banag. Ngem saantayo man laeng a kitaen no sadino ti nagtaudan dagitoy. Saantayo man laeng a gamden a taliawen ti kasapulan ti padatayo a tao iti baet nga aglaplapusanantayo. Ti laeng bagitayo ti ammotayo.

Pakaragsakan amin a tao, nakurapay man wenno napanglaw, ti kinabaknang. Ngem daytoy met laeng ti mangiyadayo kenkuana iti Namarsua. Ania ti serbina a gamgamen ti kinabaknang ti lubong no mapukawmo met ti kararuam?

Iti sabali a bangir, maparaburan dagiti ammona a taliawen ti kasapulan ti padana a tao. Ta kas iti kuna ni Jesucristo, “Aniaman nga intedmo iti padam a tao, intedmo kaniak…”

Nagasat dagiti mangisagut ta dumteng kadakuada dagiti banag a dida namnamen iti biagda – ti kasukat ti imparaburda iti padada a tao. ##