Footer

Gobierno probinsial, padayawanna ni Pacquiao

VIGAN CITY – Kasla grasia nga agtudo dagiti pammadayaw a maited ken ni Manny “Pacman” Pacquiao.

Iti naudi a session ti sangguniang panlalawigan, inaprobaran dagiti bokal ti maysa a resolusion a mangted pammadayaw ken ni Pacquiao gapu iti makapikapik a panangtumbana ken ni Erik “El Terrible” Morales iti panagrupakda manen itay Nob. 18 (Nob. 19 a.m., Manila) a naangay iti Thomas and Mach Arena, La Vegas.

Daytoy ti grand finale ti panagrupak dagiti dua a boksingero a mabigbig ken mararaem iti bukodda a pagilian

Naitaya iti daytoy maikatlo a panagboksingda ti barikes ni Pacquiao iti World Boxing Council International Super Featherweight division.

Nupay para laeng daytoy a titulo kadagiti boksingero nga adda iti ruar ti top 10 contenders, napusek ti Thomas and Mach Arena gapu iti estilo dagiti dua nga agrinnangas iti ring.

Indatag ni Bokala Chuchi Purisima babaen ti initiatibo ni Bokal Jerry Singson ti nasao a resolusion a personal nga idanon dagiti provincial officials ditoy ken ni Pacquiao apaman a makasangpet iti pagilian.

Kabayatanna, itay Biernes, kalpasan ti misa iti simbaan ti Quiapo, nag-courtesy call ni Pacquiao ken ni Manila Mayor Lito Atienza ni Pacquiao a sinaruno ti ipapanna iti Malakaniang a nangawatan kenkuana ni Pres. Arroyo. Manipud ditoy, nag-motorcade iti aglawlaw ti siudad no sadino a naimatangan ti nakabarbara a panangsarabo dagiti umili kenkuana.

Agur-uray metten dagiti kailian ni Pacquiao a mangsarabo kenkuana iti panaggawidna iti Gen. Santos City.

Kadua ni Pacquiao ti entourage ni Gov. Luis “Chavit” Singson a naimatangan pay iti telebision ti panangarakup ni Pacquiao kenkuana kalpasan ti panangdalebna ken ni Morales.

Segun ti gobernador, nainget dagiti guardia ngem napalubosan nga immuli iti ring gapu ta insenias ni Pacquiao ti yuulina.

Kinuna ti gobernador nga awisenna ni Pacquiao a tumulong iti pannakaidur-as ti programa ti isports iti probinsia nangnangruna iti boksing.

“Adu dagiti nalaing iti boksing iti probinsia,” kinuna ti gobernador sana innayon a dakkel ti namnamana a makapaltuad met ti probinsia ditoy iti kas kada Pacquiao ken Bryan Viloria.